Gala-konsertte Ózbekstannyń jetekshi solıseri men shyǵarmashylyq ujymdary óner kórsetti.
Qazaqstan men Ózbekstan arasynda dıplomatıalyq qatynastardyń ornaǵanyna 30 jyl tolýyna oraı uıymdastyrylǵan merekelik is-sharalar aıasynda dóńgelek ústelder, kórmeler men sheberlik cabaqtary ótti, dep habarlaıdy Almaty-akshamy.kz.
Sondaı-aq qazaqstandyq kórermenderge qazaq tilinde tıflokommentarııleri bar «Shaı» qysqametrajdy fılmi usynyldy. Qalıbek Qýanyshbaev atyndaǵy Qazaq mýzykalyq drama teatrynda ótken gala-konsertte Ózbekstan Respýblıkasynyń jetekshi solıseri men shyǵarmashylyq ujymdary óner kórsetti.
«Bizdi eki myń shaqyrymnan astam shekara ǵana emes, eki myń jyldyq tarıh biriktiredi. Sizder bizge arnaıy alyp kelgen mazmuny tereń, maǵynasy baı baǵdarlamalar kóshi sol ıgi sabaqtastyqty jalǵastyryp otyr. Alaıda, qos tarap bul rýhanı baılanyspen shektelip qalmaýy tıis. Aldaǵy ýaqytta mádenı almasýdan bólek, birlesken ortaq jobalardy júzege asyrý qajet. Biz burynnan tatýlyqty tabysqa, birlikti berekege aınaldyryp kele jatqan aǵaıyndas halyqtarmyz. Túbi bir túrki áleminiń qos qazyǵyndaı qazaq-ózbek qatynasy nyǵaıa berýine shyn júrekten tilektespin», - dedi Mádenıet jáne sport mınıstri Dáýren Abaev.
Óz kezeginde ózbek tarapy Mádenıet jáne sport mınıstrligine is-sharalardy uıymdastyrýǵa kómekteskeni úshin alǵys aıtyp, Qazaqstan tarapynyń jobalary men bastamalaryna joǵary qyzyǵýshylyq tanytqanyn atap ótti.