Prezıdent janyndaǵy Áıelder isteri jáne otbasylyq-demografıalyq saıasat jónindegi ulttyq komısıa Qazaqstandaǵy otbasylardyń ajyrasý kórsetkishi kóbeıip ketkenin málimdedi, dep habarlaıdy Almaty-akshamy.kz QazAqparatqa silteme jasap.
Vedomstvo áleýmettik jelidegi paraqshasynda nekeniń eń qaýipti kezeńin de ataǵan.
«Jasyratyny joq, Qazaqstanda nekege turý sany azaıyp, ajyrasýlar birtindep kóbeıip keledi. Bul aqparat Qazaqstandyq qoǵamdyq damý ınstıtýty (QQDI) júrgizgen «Qazaq otbasy-2020» ulttyq baıandamasynda jınaqtalǵan. Sarapshylardyń pikirinshe, erli-zaıyptylar úshin eń qıyny nekeniń birinshi onjyldyǵy eken (bul barlyq ajyrasýlardyń jalpy sanynan 61,5%-yna jetken). Sonymen qatar, nekege turýdyń alǵashqy tórt jyly barlyq ajyrasýlardyń úshten birin quraıdy», - dep jazdy ulttyq komısıadan.
Jazbada ajyrasýlardyń 30%-ǵa jýyǵy nekeniń besinshi jáne onynshy jyldarynda bolatyndyǵy aıtylǵan. On jyldyq nekeden keıin ajyrasý yqtımaldyǵy 20 jyldyq kezeńge deıin kúrt tómendeıdi. Esesine, jıyrma jyldyq nekeden keıin ajyrasqan otbasylar sany qaıtadan ósedi: bul ajyrasýlardyń jalpy úlesiniń 13,7 %-yn quraıdy.
«QQDI sarapshylarynyń aıtýynsha, jıyrma jyldyq nekeden keıin ajyrasýdyń ósýi «bos uıa» kezeńin kórsetedi, ıaǵnı balalar ósip, otbasyn tastap ketken. Sodan keıin jınaqtalǵan renish, ózara sharshaý jáne basqa da faktorlar erli-zaıyptylardyń odan ári birge ómir súrýine birshama kedergi keltiredi. Sonymen qatar, sarapshylar bul jasta nekeniń buzylýyna janama túrde ómir súrý deńgeıiniń aıtarlyqtaı joǵary bolatyndyǵy áser etedi dep sanaıdy. Óıtkeni burynǵy erli-zaıyptylardyń bir-birinsiz erkin júrip-turýyna múmkindigi bar», - delingen jarıalanymda.