Quny 36,1 mlrd teńge bolatyn jobanyń tabysty iske asyrylýy kásiporynnyń Qarajanbas ken ornynan keletin munaıdy qaıta óńdeý qýattylyǵyn jylyna 1 mıllıonnan 1,5 mıllıon tonnaǵa deıin arttyrýǵa múmkindik beredi. Jańǵyrtýdyń negizgi nátıjesi – joǵary sapaly jol bıtýmyn óndirý kólemin 50%-ǵa, ıaǵnı 500 myńnan 750 myń tonnaǵa deıin ulǵaıtý bolmaq. Bul qadam Qazaqstan úshin strategıalyq mańyzǵa ıe, sebebi ol eldiń jol bıtýmyna degen ishki suranysyn tolyq óteýge, aýqymdy ınfraqurylymdyq jobalardy iske asyrýdy qamtamasyz etýge jáne jol qurylysy salasyna turaqty jetkizýdi jolǵa qoıýǵa múmkindik beredi.
Joba aıasynda Qarajanbastyń aýyr munaıyn qaıta óńdeýge beıimdelgen jańa joǵary tehnologıalyq jabdyqtar ornatylyp, eski toraptar tolyqtaı aýystyryldy jáne aýqymdy qurylys-montaj jumystary júrgizildi. Bul jumystarǵa 300-den astam jumysshy men maman tartyldy.
Qazirgi tańda Caspi Bitum zaýytynda iske qosý-baptaý jumystarynyń sońǵy kezeńi júrgizilýde: shıki munaı qabyldanýda, tehnologıalyq jabdyqtar men basqarý júıeleri jeke-jeke synaqtan ótip, keshendi túrde tekserilýde. Sáýir aıynda jańǵyrtylǵan qýattylyq bazasynda alǵashqy synaqtyq bıtým partıalary óndirilip, shamamen 8 myń tonna ónim shyǵarý josparlanyp otyr.
«Caspi Bitum zaýytynyń jańǵyrtylǵan óndirisin iske qosý – elimiz úshin strategıalyq mańyzdy qadam. Otandyq bıtým óndirisiniń 50%-ǵa artýy joldardy salý jáne jóndeý qarqynyn jedeldetýge, olardyń sapasy men uzaq merzimdiligin arttyrýǵa jol ashady. Bul – ınfraqurylymdy damytýǵa, logıstıkany jaqsartýǵa jáne aqyr sońynda qazaqstandyqtardyń ómir súrý sapasyn arttyrýǵa jasalǵan tikeleı ınvestısıa. Sondaı-aq bul – elimizdiń uzaqmerzimdi munaı óńdeý jáne munaı-hımıa ónerkásibin damytý saıasaty aıasynda júzege asyrylyp jatqan, shıkizattyq baǵyttan tereń óńdeýge kóshý jolyndaǵy mańyzdy qadam», – dep atap ótti QR energetıka mınıstri Erlan Aqkenjenov.
Ortalyq Azıadaǵy eń iri jol bıtýmyn óndirýshi Caspi Bitum zaýytynyń jańǵyrtylǵan óndirisin iske qosý Qazaqstan Respýblıkasy Úkimetiniń ekonomıkalyq ósimdi qamtamasyz etý jónindegi is-qımyl josparyna engizilgen. Bul shara ulttyq ınfraqurylymdyq jobalardy júzege asyrýǵa eleýli úles qosyp, Mańǵystaý oblysynyń ónerkásiptik áleýetin nyǵaıtatyn bolady.