Áleýmettik jelilerde taraǵan rolıkte Qazaqstanda Kókkólde Loh-Ness qubyjyǵy mekendeıtini aıtylady.
Jylan tárizdi ejelgi tirshilik ıesi denesiniń uzyndyǵy 15 metrge jetedi. Ýfologtardyń pikirinshe, qubyjyq kól túbindegi úńgirlerde jasyrynady. Al sý aıdynynda qubyjyqtyń baryn qyryldaǵan, yńyrsyǵan dybystardan jáne sýdyń shalpyldaǵanynan baıqaýǵa bolady eken, dep habarlaıdy aqshamnews.kz.
Stopfake.kz bul aqparattyń jalǵan ekenin habarlaıdy. Ǵalymdar bul jaǵdaıdy jaı ǵana túsindirdi.
Kókkól – óte ádemi jer. Sý qoımasy Qazaqstannyń ońtústiginde, Jambyl oblysynda taýly jerde ornalasqan. Halyq arasynda Kókkól týraly ańyzdar men mıfter kóp. Munda sýdyń rýhy Aıdahar tirshilik etedi eken. Onyń aqyrýy kerneıdiń dybysyna uqsaıdy eken. Árıne, bul ertegi.
Kókkól óziniń erekshe fızıkalyq qasıetterine baılanysty Qazaqstannyń anomaldy aımaqtarynyń tizimine endi. Mundaǵy sý árdaıym taza, biraq kólge eshqandaı ózen quımaıdy, Kókkóldiń sýy da eshqaıda aqpaıdy. Taǵy bir ereksheligi – sýda shuńqyrlar jáne uzyn jolaqty tolqyndar paıda bolady. Bul sý astynda uzyn ań júzip kele jatqandaı áser qaldyrady.
Ártúrli elderdiń gıdrologtary Kókkólge kópten beri qyzyǵýshylyq tanytyp keledi. Olar zertteýler júrgizip, Kókkóldiń muzdaqtardan jáne taý jynystarynyń morenalyq qyrtystar qabatynda paıda bolǵanyn anyqtady. Morena – geologıalyq shógindiler. Jaı sózben aıtqanda, ártúrli synyq materıaly. Bul – úlken tastar, saz jáne usaq tastar.
Morenalarda kanaldar, shuńqyrlar, sý astyndaǵy úńgirler paıda bolýy múmkin. Sý aýada sińirilgen kezde, oǵash ýildegen dybystar, shuńqyrlar paıda bolady.
Jergilikti turǵyndardyń aıtýynsha, kól sýynyń emdik qasıetteri bar. Ǵalymdar bul derekti rastady. Úńgirlerdiń qýystaryna tartylǵan kezde sý mıneraldar men tuzdarmen qanyqqan.
Kókkól – tylsym kúshke toly jer. Dese de, onda qubyjyq mekendemeıdi. Gıdrolog ǵalymdar sý betindegi oǵash dybystardy, shuńqyrlar men tolqyndardy onyń paıda bolýymen baılanystyrady.