Statısıkaǵa sáıkes, Skills Enbek kásibı onlaın oqytý platformasynda paıdalanýshylardyń 60%-dan astamy áıelder.
Bul rette olar kem degende bir kýrsty aıaqtap, shamamen 81% sertıfıkat aldy, dep habarlaıdy aqshamnews.kz.
Máselen, 1 naýryzdaǵy jaǵdaı boıynsha portalda 527,5 myń paıdalanýshy tirkelgen, onyń 433,4 myńy oqýyn aıaqtaǵan. Sáıkesinshe tirkelender arasynda áıelderdiń úlesi 62%-dy qurasa, oqytýdan ótkenderdiń 61% názik jandylar.
Oqýyn aıaqtaǵan áıelderdiń eń kóp sany Túrkistan, Qyzylorda, Almaty, Jambyl oblystary men Shymkent qalasynyń turǵyndary.
Bilim alýshy áıelderdiń ortasha jasy – 38 jas, eń kishisi – 14 jas, al eń úlkeni – 78 jasta. Sonymen qatar 140 jáne 182 kýrsty meńgergen áıelder de bar.
Sonymen qatar, jumysshy mamandyqtary boıynsha kýrstarǵa áıelder kóptep jazylýda. Áıelder oqıtyn erekshe kýrstardyń ishinde «Avtomobıl kóligimen tasymaldaýdy uıymdastyrý», «Jylý jelileriniń jabdyqtary, qubyrlary men armatýralaryna qyzmet kórsetý jáne jóndeý», «Dánekerleý óndirisiniń negizderi», «Elektr jabdyqtaryna qyzmet kórsetý jáne jóndeý boıynsha elektr slesarlyq jumystar», «Qazandyq agregattaryna qyzmet kórsetý jáne jóndeý» bar.
Eńbek resýrstaryn damytý ortalyǵynyń sarapshylary áıelderge kýrstardy tańdaý boıynsha usynystar berdi. Olardyń aıtýynsha, kásipkerlik, IT-sala, marketıń, aýyl sharýashylyǵy jáne áleýmettik qyzmet sıaqty tanymal baǵyttarǵa nazar aýdarý qajet.
Esterińizge sala keteıik, Skills Enbek platformasy jynysyna nemese áleýmettik mártebesine qaramastan barlyǵyna sapaly bilim alýǵa múmkindik bere otyryp, Qazaqstandaǵy onlaın-oqytý salasyn jaqsartýǵa arnalǵan. Platformada azamattarǵa jańa bilim alýǵa jáne biliktiligin arttyrýǵa kómektesetin túrli baǵyttar boıynsha 859 kýrs usynylǵan. Kýrsty derbes kompúterler arqyly da, Enbek mobıldi qosymshasynda smartfon arqyly da oqýǵa bolady.