Qazirgi ýaqytta baıqaýǵa qatysý úshin qujattardy qabyldaý júrip jatyr.
Qazaqstanda muǵalimder tapshylyǵy bar jáne bilim sapasy nashar óńirlerge úzdik pedagogterdi tartý boıynsha arnaıy baǵdarlama bastaldy, dep habarlady Almaty-akshamy.kz.
«Qazirgi ýaqytta baıqaýǵa qatysý úshin qujattardy qabyldaý júrip jatyr. Qajetti qujattar tizimi jergilikti atqarýshy organdardyń jáne NZM aqparat resýrstarynda ornalastyrylǵan. Qujattar 2022 jylǵy 26 maýsymǵa deıin qabyldanady», - delingen Bilim mınıstrliginiń baspasóz qyzmetiniń habarlamasynda.
Buǵan deıin Oqý-aǵartý mınıstrligi Memleket basshysynyń tapsyrmasy boıynsha muǵalimder tapshylyǵy nemese bilim sapasy nashar óńirlerge úzdik pedagogterdi tartý úshin arnaıy baǵdarlama ázirlegen bolatyn. Másele Túrkistan, Atyraý, Mańǵystaý jáne Almaty oblystary jaıynda. Bul aımaqtarǵa matematıka, fızıka, hımıa, orys tili men ádebıeti, shet tili muǵalimderi qajet.
«Halyqaralyq PISA 2018 zertteýiniń jáne Ulttyq biryńǵaı testileýdiń nátıjeleri basqa oblystardyń oqýshylarymen salystyrǵanda osy óńirler oqýshylarynyń biliminde alshaqtyq baryn kórsetip otyr. Osy óńirlerdiń bilim sapasyn arttyrý jáne pedagog tapshylyǵy máselesin sheshý úshin úzdik muǵalimderdi tartý maqsatynda arnaıy baǵdarlama ázirlendi. Pedagogter konkýrs arqyly irikteledi. Konkýrsqa tıisti beıinder boıynsha joǵary pedagogıkalyq, joǵary kásiptik bilimi bar, «pedagog-sarapshy», «pedagog-zertteýshi», «pedagog-magıstr» biliktilik sanattary bar muǵalimder, sondaı-aq oqý úlgerimi jaqsy joǵary oqý oryndarynyń pedagogıkalyq mamandyqtarynyń túlekteri qatysa alady. Pedagogterge konkýrsqa turǵylyqty jerine qaramastan qatysýyna bolady», – dedi Oqý-aǵartý mınıstrligi Mektepke deıingi jáne orta bilim komıtetiniń tóraǵasy Gúlmıra Kárimova.
Muǵalimderdi bos laýazymdarǵa tartý úshin tıisti aımaqtardyń oblystyq bilim basqarmalary janynan Úılestirý keńesteri, sondaı-aq mınıstrlik janynan Konkýrs komısıasy qurylady.
Bos jumys oryndaryna ornalasý úshin úmitkerler kompúterlik testileýdi sátti tapsyryp, esse jazyp, áńgimelesýden ótýi kerek.
Emtıhandar úmitkerdiń tańdaýy boıynsha óńirdegi Nazarbaev zıatkerlik mektepterinde qazaq, orys nemese aǵylshyn tilderinde ótkiziledi.
Al áńgimelesýdi mınıstrlik janyndaǵy konkýrstyq komısıa ótkizedi. Komısıa quramyna «NZM» DBBU, Y. Altynsarın atyndaǵy UBA, «Órleý» BAUO» AQ jáne Oqý-aǵartý mınıstrliginiń ókilderi kiredi.
Konkýrs irikteýinen ótken muǵalimderge 4 aptalyq biliktilikti arttyrý kýrstary men kýrstan keıingi qoldaý sharalary uıymdastyrylady. Onyń quramyna onlaın jáne oflaın formattaǵy semınarlar, vebınarlar men sheberlik synyptary, Zıatkerlik mektepterdiń zerthanalarynda jaratylystaný pánderi muǵalimderine arnalǵan taǵylymdamalar kiredi.
Úzdik pedagogterdi tartýǵa arnalǵan arnaıy baǵdarlamada muǵalimderdi qoldaýǵa baǵyttalǵan sharalar kesheni bar. Atap aıtqanda, laýazymdyq jalaqynyń 250% mólsherinde yntalandyrý tólemderi bar, onyń ishinde jalaqyny kóterý, turǵyn úıdi jaldaý aqysyn jáne komýnaldyq tólemder shyǵyn óteý qarastyrylǵan.