Ashyq sýda uzaq qashyqtyqta júzý boıynsha ótetin eń buqaralyq báseke bolady.
Shildeniń 2-3 kúnderi aralyǵynda Kapshaǵaı sý qoımasynda halyqaralyq deńgeıdegi júzý jarystary serıasynyń Oceanman Kazakhstan sporttyq sharasy ótedi, dep habarlaıdy Almaty-akshamy.kz.
Jarysqa Qazaqstan, Qyrǵyzstan, Ózbekstan, Ýkraına, Italıa, Shveısarıa jáne Túrkıa elderinen 1200 adam qatysady. Bul áýesqoı jáne kásibı sportshylardyń basyn qosatyn Qazaqstan tarıhynda ashyq sýda uzaq qashyqtyqta júzý boıynsha ótetin eń buqaralyq báseke bolmaq.
Oceanman – chempıonatqa biriktirilgen álemniń birneshe jerinde ótetin jarystar toby. Bul shara 2015 jyly Ispanıadan bastaý alǵan, Sol sátten beri jahannyń eń ádemi jerlerinde – Italıa, Malaızıa, Meksıka, Túrkıa, Reseı, Gresıa, Fransıa, Ýkraına, Shveısarıa, Taıland, Kıpr jáne Kolýmbıada ótip keledi. Osylaısha, Oceanman jer sharyn aınalǵan saıahatqa aınaldy. Endi Qazaqstanǵa da jol tústi.
«Oceanman – Ironman qozǵalysynyń bir túri ispettes. Bul jarysta qatysýshylar óz múmkindikterin sý stıhıasynda, ashyq sý qoımalarynda synaıdy. Bul chempıonattyń basty ereksheligi – onyń ashyqtyǵy. Jarys túrli elder, túrli jastaǵy, túrli mamandyqtaǵy, fızıkalyq daıyndyǵy ártúrli, túrli maqsattary men motıvısıalary bar myńdaǵan adamdy bir arnaǵa toǵystyrady», - deıdi sharany uıymdastyrýshylar.
Uıymdastyrýshylardyń aıtýynsha, qazaqstandyqtar júzý jarysyna qatysýǵa qýana-qýana nıet bildirdi jáne Oceanman Kazakhstan sońǵy úsh jyldaǵy eń buqaralyq sharaǵa aınaldy. Bul – salaýatty ómir salty men buqaralyq sporttyń otandastarymyz úshin bos sóz emes ekenin rastaıdy.