Búginnen bastap Qazaqstanda toı-tomalaq ótkizýge ruqsat berildi. Biraq onyń ózindik talaptary bar. Osy oraıda QR Premer-Mınıstrdiń orynbasary Eraly Toǵjanov toıǵa ruqsat berýdiń sebebin túsindirip berdi, dep habarlaıdy almaty-akshamy.kz
«Elimizde birqatar is-sharalardy ótkizýge ruqsat berdik, biraq qatań sharttary bar. Birinshiden, sharaǵa qatysýshylardyń Ashyq-ta «jasyl» mártebesi bolýy kerek. Biz epıdemıologıalyq jaǵdaıdy eskere otyryp, birtindep qalypty ómirge oralýymyz kerek. Saltanatty sharalardyń ótkizýge ruqsat berý - bul tek toı-tomalaq ótkizýge ǵana qatysty emes. Birinshi kezekte másele shaǵyn jáne orta bıznesti qoldaý tóńireginde bolyp otyr. Bul - kún tártibindegi eń mańyzdy máseleniń biri. Taǵy bir jaıt, elimizde saltanatty is-sharalardy ótkizý qatań baqylaýda bolatynyn eske salǵym keledi. Qazaqstanda KVI-diń taralýyn baqylaý men toqtatý sharalary kún tártibinen túspeıdi», - dedi Eraly Toǵjanov Úkimet úıinde ótken baspasóz máslıhatynda.