Mundaı qyzmetke muqtaj azamattardyń 21,6% bul qyzmetti syrttaı alǵan.
Qazaqstan Úkimeti medısınalyq-áleýmettik saraptama júrgizýdiń syrttaı formaty boıynsha jobany iske asyryp jatyr. Osy joba aıasynda múgedektikti belgileý boıynsha syrttaı qyzmet kórsetý kólemi artyp keledi, dep habarlaıdy Almaty-akshamy.kz.
«Múgedektik tobyn belgileý úshin medısınalyq-áleýmettik saraptama júrgizýdiń syrttaı formaty boıynsha pılottyq jobany iske asyrý sheńberinde 2022 jyldyń 1 jartyjyldyǵynda Qazaqstannyń barlyq óńirlerinen 28,2 myńǵa jýyq ótinim qaraldy. Qazirgi ýaqytta jobaǵa 589 medısınalyq uıym qosylǵan», - delingen Eńbekmıni baspasóz qyzmetiniń habarlamasynda.
Mamamandardyń aıtýynsha, pılottyq joba arqyly 2022 jyly múgedektikti belgileý boıynsha syrttaı qyzmet kórsetýmen qamtýdy 20%-ǵa deıin jetkizý josparlanǵan. Qazirgi ýaqytta bul kórsetkish 21,6%-dy quraıdy.
Buǵan deıin habarlanǵandaı, Ulttyq qoǵamdyq senim keńesiniń VI otyrysynda Memleket basshysy erekshe qajettilikteri bar adamdar úshin barynsha qolaıly jaǵdaı jasaýdy, olardy qaǵazbastylyqtan aryltýdy, ınstansıalar boıynsha júrýin jáne qyzmet kórsetýshilerdiń qyzmet alýshylarmen baılanysyn boldyrmaýdy tapsyrdy.
Osy tapsyrmany oryndaý maqsatynda QR Eńbek jáne halyqty áleýmettik qorǵaý mınıstrligi Densaýlyq saqtaý jáne Sıfrlyq damý, ınovasıalar jáne aeroǵarysh ónerkásibi mınıstrlikterimen birlesip, Qazaqstannyń barlyq 20 óńirinde pılottyq rejımde medısınalyq-áleýmettik saraptama júrgizýdiń syrttaı formaty boıynsha joba iske asyrýda.
Múgedektik tobyn anyqtaý boıynsha qyzmet alý úshin ótinish berýshi tek turǵylyqty jeri boıynsha emhanaǵa baryp, qajetti tekserýden ótýi qajet, qalǵan prosester aqparattyq júıelerdi ıntegrasıalaý esebinen onyń qatysýynsyz ótedi.
Jalpy, syrttaı kýálandyrýǵa kóshý:
- ákimshilik jáne búrokratıalyq kedergilerdi joıady;
- MÁS saraptamalyq sheshimderiniń ashyqtyǵyn qamtamasyz etedi;
- úıden shyqpaı-aq múgedektikti belgileý jáne múgedektigi bar adamdardy áleýmettik qorǵaý sharalaryn aıqyndaý boıynsha qyzmetter alýǵa múmkindik beredi;
- kórsetiletin qyzmetti alýshynyń kórsetiletin qyzmetti berýshimen tikeleı baılanysyn boldyrmaıdy, osylaısha sybaılas jemqorlyq táýekelderin barynsha azaıtady.