Múgedektigi bar adamdardyń zańdy quqyqtaryn qamtamasyz etý jáne olar úshin qoljetimdi ortany qalyptastyrý maqsatynda 2023 jyly jergilikti atqarýshy organdar áleýmettik ınfraqurylymnyń 4 926 obektisin beıimdeý boıynsha is-sharalar ótkizdi.
Qazaqstanda sońǵy úsh jylda barlyǵy 13,8 myńnan astam nysan beıimdeldi, dep habarlaıdy Almaty-akshamy.kz Eńbek jáne halyqty áleýmettik qorǵaý mınıstrligine silteme jasap.
Qazirgi ýaqytta elimizde 2025 jylǵa deıin Qazaqstan Respýblıkasynda múgedektigi bar adamdardyń quqyqtaryn qamtamasyz etý jáne ómir súrý sapasyn jaqsartý jónindegi ulttyq jospar, «Amanat» partıasynyń 2023 – 2027 jyldardaǵy jol kartasy jáne Memleket basshysynyń tapsyrmasy boıynsha ázirlengen «Halyqpen birge» jobasy iske asyrylýda.
Jobada qoljetimdiliktiń ınteraktıvti kartasy saıtyna engizilgen el boıynsha beıimdelýge tıis 35 myńnan astam basym obektiler aıqyndaldy. 2021 – 2022 jyldary 8 myńnan astam nysan beıimdeldi. 2023 – 2027 jyldar kezeńinde jyl saıyn keminde 5 myń obekt (5 jylda 27 myń) beıimdelýge tıis. 2021 – 2022 jyldardy qosa alǵanda, 2023 jyldyń qorytyndysy boıynsha 13 857 obekt beıimdeldi.
2023 jyly beıimdelýge josparlanǵan 5416 obektiniń ishinen jergilikti atqarýshy organdar 4 926 obektide beıimdelý is-sharalaryn júrgizdi, bul josparlanǵan kólemniń 91%-yn quraıdy.
2023 jylǵa arnalǵan beıimdeý josparyn iske asyrý boıynsha Aqmola, Aqtóbe, Almaty, Jambyl, Jetisý, Batys Qazaqstan, Qaraǵandy, Qostanaı, Qyzylorda, Túrkistan oblystary tolyq, júz paıyzdyq oń nátıje kórsetýde. Almaty qalasynda jospardyń 90%-dan astamy iske asyryldy. Al, Astana, Shymkent, Atyraý, Abaı, Shyǵys Qazaqstan, Mańǵystaý, Pavlodar, Ulytaý, Soltústik Qazaqstan oblystarynda kerisinshe jospardyń oryndalýy 90 %-dan tómen bolyp, jaqsy kórsetkish baıqalmaıdy.
Máselen, el boıynsha múgedektigi bar adamdardyń barlyq sanattary úshin qol jetimdi:
- bilim berý obektileri – 5847 (mektepter, balabaqshalar jáne t. b.);
- densaýlyq saqtaý obektileri – 2160 (aýrýhanalar, emhanalar, dárigerlik ambýlatorıalar jáne t. b.)
- mádenıet obektileri – 1433 (mádenıet úıleri, teatrlar jáne t. b.);
- mekemeler men uıymdar (onyń ishinde memlekettik) – 2695 (jergilikti atqarýshy organdar, ortalyq organdardyń aýmaqtyq bólimsheleri, azamattarǵa arnalǵan úkimet fılıaldary jáne t. b.);
- saýda, qyzmet kórsetý, oıyn-saýyq, qoǵamdyq tamaqtaný obektileri – 1165 (dúkender, saýda ortalyqtary, kafeler, meıramhanalar jáne t.b.).
- áleýmettik qorǵaý obektileri – 178 (arnaýly áleýmettik qyzmetter kórsetý ortalyqtary, ońaltý ortalyqtary jáne t. b.);
- sport obektileri – 289 (sport zaldary, sport saraılary jáne t. b.);
- kólik ınfraqurylymy obektileri – 90 (Avto/TJ vokzaldary, áýejaılar).
Óńirlerde múgedektigi bar adamdar áleýmettik ınfraqurylym obektileriniń beıimdelý is-sharalaryn júrgizýde oń dınamıkany atap ótedi.
«Men «Amanat» partıasynyń fılıaly janyndaǵy obektilerdi beıimdeý jónindegi oblystyq monıtorıńtik toptyń múshesimin. Jumys toby áleýmettik ınfraqurylym obektilerine, atap aıtqanda temirjol vokzalyna, avtovokzalǵa, Halyq banki fılıalyna, HQKO-ǵa jáne basqa da obektilerge barǵan kezde men azamattardyń barlyq sanattary úshin qoljetimdilikti qamtamasyz etý bóliginde oń ózgeristerdi baıqadym. Nysandar múgedekter arbasyna, nashar kóretin jáne nashar estıtin azamattarǵa, halyqtyń az qozǵalatyn toptaryna beıimdelgen. Kireberis toptary tolyǵymen qaıta jańartýdan ótti, pandýstardyń parametrleri normalarǵa sáıkes keledi, temirjol vokzalynda perronǵa shyǵýdyń yńǵaılylyǵy úshin lıftiler ornatyldy, barlyq obektilerde sanıtarlyq toraptar jabdyqtalǵan», – dedi birinshi toptaǵy múgedektigi bar, Soltústik Qazaqstan oblysy ákiminiń múgedektigi bar adamdar máseleleri jónindegi keńesshisi Vladımır Erman.
Sonymen qatar, memlekettik baqylaý sheńberinde Eńbek jáne áleýmettik qorǵaý komıtetiniń aýmaqtyq departamentteri 2023 jyly el boıynsha memlekettik basqarý, densaýlyq saqtaý, áleýmettik qorǵaý, mádenıet jáne t. b. salalardaǵy áleýmettik ınfraqurylym obektilerine 1 783 tekserý (880 – profılaktıkalyq baqylaý, 903 – jospardan tys) júrgizdi. Tekserý qorytyndysy boıynsha anyqtalǵan buzýshylyqtardy joıý týraly 1 171 uıǵarym berildi, 98,4 mln teńge somasyna 467 ákimshilik aıyppul salyndy.
Obektilerdiń menshik ıelerine profılaktıkalyq baqylaý júrgizý kezinde buzýshylyqtar alǵash ret anyqtalǵan kezde olardy ákimshilik jaýapkershilikke tartpaı joıý týraly nusqamalar ǵana beriletinin atap ótý qajet. Nusqama belgilengen merzimde oryndalmaǵan jaǵdaıda QR ÁQBtK 462-baby boıynsha aıyppul salynady.