QR Oqý-aǵartý mınıstrliginiń bastamasymen IýNISEF-pen birlese júrgizilgen "Kazakhstan Kids Online" aýqymdy zertteýi negizinde Qazaqstanda balalardyń ınternetti paıdalanýymen baılanysty eleýli syn-qaterler anyqtaldy.
Zertteýdiń negizgi qorytyndysy sıfrlyq álemde balalar úshin qaýipterdi azaıtý jáne qoldaý strategıalaryn ázirleýge baǵyttalǵan, dep habarlaıdy Almaty-akshamy.kz.
Internet bala ómiriniń mańyzdy bir bóligine aınalýda. Zertteý nátıjesine sáıkes, balalardyń 5%-y jelige alǵash ret tórt jasta, keı jaǵdaıda tipti odan da erte jasta kiredi. Al 9-10 jas aralyǵyndaǵy balalardyń 60%-y jáne 11-12 jas aralyǵyndaǵy balalardyń 66%-y áleýmettik jeliler men oıyn platformalarynda óz akkaýnttaryna ıe.
Eń alańdatarlyq tujyrymdardyń biri − balalardyń 15,3%-y kúndelikti, apta saıyn nemese kem degende aıyna bir ret ınternette jaǵymsyz kontentpen betpe-bet keledi. Ol balalardyń 11,7%-y qatty kúızeliske ushyraǵan. Bul másele jas urpaq arasynda kıberqaýipsizdikti kúsheıtýdiń tez arada qolǵa alynýy kerek ekenin kórsetedi.
Statısıkalyq derekterge súıensek, kıberbýllıngke kýá bolǵan balalardyń basym bóligi (52,1%) ol týraly eshkimge aıtpaýdy jón kóredi. Al ata-analardyń 17,6%-y ǵana tyıym salynǵan kontentti buǵattaý jáne zıandy materıaldardy súzgiden ótkizý quraldaryn paıdalanady.
Osy tusta Oqý-aǵartý mınıstrligi Balalardyń quqyqtaryn qorǵaý komıteti ata-analarǵa «Ata-ana baqylaýy» qosymshasyn usynady. Bul onlaın keńistikte balalardyń qaýipsizdigin qamtamasyz etetin tıimdi qural. Qoldanbany Play MARKET jáne APP STORE platformalarynan júkteýge bolady.
«Ata-ana baqylaýy balalardyń ınternettegi qaýipsizdigin qamtamasyz etýdiń jalpy strategıasynyń bir bóligi ǵana. Balalarmen ashyq dıalog júrgizý jáne olardyń onlaın ómirin únemi talqylaý mańyzdy. Biz ata-analar, pedagogter, AKT − mamandary men BAQ ókilderiniń ınternettegi balalardyń qaýipsizdigin qamtamasyz etýde mańyzdy ról atqaratynyna senimdimiz», - dep atap ótti Balalardyń quqyqtaryn qorǵaý komıtetiniń tóraǵasy Nasymjan Ospanova.
Komıtet ata-analardyń ata-analar baqylaýy qosymshalaryn paıdalanýdyń mańyzdylyǵy týraly habardar bolýyn arttyrýǵa jáne olardy onlaın-keńistikte balalardyń qaýipsizdigin qamtamasyz etýdiń tıimdi ádisterine úıretýge baǵyttalǵan keń aýqymdy naýqan ótkizýdi maqsat etedi.