Áleýmettik tólemder mólsheri ulǵaıtyldy.
Qazaqstan Úkimeti mindetti áleýmettik saqtandyrý júıesindegi ózgerister týraly aıtty, dep habarlaıdy Almaty-akshamy.kz.
"2023 jylǵy 1 qańtardan bastap Memlekettik áleýmettik saqtandyrý qorynan jumysynan aıyrylǵan, eńbekke qabilettiliginen aıyrylý jáne asyraýshysynan aıyrylý jaǵdaılary boıynsha áleýmettik tólemder mólsheri ulǵaıtyldy, sondaı-aq bala kútimi boıynsha tólemder kezeńi uzartyldy", - delingen Eńbekmıni baspasóz qyzmetiniń habarlamasynda.
Memleket basshysynyń Joldaýyn iske asyrý sheńberinde jumysynan aıyrylǵan jaǵdaıda tólenetin áleýmettik tólemdi esepteý úshin qoldanylatyn tabysty almastyrý koefısıenti 40%-dan 45%-ǵa deıin ulǵaıtyldy. 2023 jyly 117 myńǵa jýyq azamatqa jumysynan aıyrylǵan jaǵdaıda tólenetin áleýmettik tólem orta eseppen 13%-ǵa ósip, arttyrylǵan mólsherde taǵaıyndalady dep kútilýde.
Sondaı-aq bala kútimi boıynsha áleýmettik tólemdi júzege asyrý uzaqtyǵy 1 jastan 1,5 jasqa deıin uzartyldy. Bıyl bul tólem 500 myńnan astam ata-anaǵa taǵaıyndalýy josparlanýda.
Budan bólek, eńbekke qabilettiliginen aıyrylǵan 78 myń adamǵa jáne asyraýshysynan aıyrylǵan 55 myń otbasyǵa bazalyq memlekettik járdemaqylarǵa qosymsha taǵaıyndalatyn áleýmettik tólemderdiń mólsheri 8,5%-ǵa artty.
Osylaısha, jumys isteıtin azamattardy áleýmettik qamsyzdandyrý jumys istemeıtinderge qaraǵanda joǵary bolmaq.