Orta eseppen 493,1 myń otbasy qamtyldy.
Qazaqstan Úkimeti jyl basynan beri kóp balaly otbasylarǵa 83 mlrd teńgege jýyq kómek bergen, dep habarlaıdy Almaty-akshamy.kz.
«2022 jyldyń basynan bastap kóp balaly otbasylarǵa beriletin memlekettik járdemaqy tólemderimen jalpy somasy 82,2 mlrd teńgege orta eseppen 493,1 myń otbasy qamtyldy, onyń ishinde naýryz aıynda 499,3 myń otbasy jalpy somasy 27,8 mlrd teńge járdemaqy aldy», - delingen Eńbekmıni baspasóz qyzmetiniń habarlamasynda.
Atalǵan memlekettik járdemaqyǵa 4 jáne odan da kóp birge turatyn kámeletke tolmaǵan nemese 23 jasqa deıingi kúndizgi bólimde oqıtyn stýdent balalary bar otbasylar tabysyna qaramastan úmitker bola alady.
Tólem mólsheri balalardyń sanyna baılanysty saralanyp tólenedi jáne 2022 jyly 4 balaǵa - 49 100 teńgeni, 5 balaǵa - 61 383 teńgeni, 6 balaǵa - 73 666 teńgeni, 7 balaǵa - 85 948 teńgeni, 8 balaǵa – 98 016 teńgeni, 9 balaǵa – 110 268 teńgeni, 10 balaǵa – 122 520 teńgeni, 11 balaǵa – 134 772 teńgeni, 12 balaǵa – 147 024 teńgeni, 13 balaǵa – 159 276 teńgeni, 14 balaǵa – 171 528 teńgeni, 15 balaǵa – 183 780 teńgeni, 16 balaǵa – 196 032 teńgeni nemese ár balaǵa 12 252 teńgeni quraıdy.
Eske sala keteıik, kóp balaly otbasylarǵa olardyń kiristerin esepke almaı beriletin memlekettik járdemaqy Qazaqstanda 2020 jyldyń 1 qańtarynan bastap ataýly áleýmettik kómek kórsetýdiń jańa tetikterinde kózdelgen tabysy az jáne kóp balaly otbasylardy qoldaýdyń úsh negizgi baǵyty sheńberinde engizilgen bolatyn.