Qazir álem elderi júkterdi konteınerlermen tasymaldaýǵa qarqyndy túrde kóship jatyr.
QR Indýstrıa jáne ınfraqurylymdyq damý mınıstrligi «Qazaqstan temir joly» ulttyq kompanıasymen birlesip tasymal naryǵyna muqıat taldaý júrgizdi, dep habarlaıdy Almaty-akshamy.k QR Indýstrıa jáne ınfraqurylymdyq damý mınıstrligine silteme jasap.
Eksporttyq júkterdi konteınerleýdiń boljamdy kólemi jáne konteınerlerge qajettilik aıqyndaldy.
Bul týraly QR Úkimeti otyrysynda QR Indýstrıa jáne ınfraqurylymdyq damý mınıstri Qaıyrbek Óskenbaev málimdedi.
Mınıstrdiń aıtýynsha, bastapqy kezeńde 2 mln tonna júkti konteınerlendirý josparlanyp otyr. Qytaımen shekaradaǵy karantındik shekteýlerge baılanysty elimizdiń negizgi kásiporyndary - ArselorMıttal, ERG, Qazmyrysh, Qazhrom, Qazmınerals jáne YDD óz júkterin konteınerleýge qyzyǵýshylyq bildirdi.
Eksportty tasymaldaý úshin «Qazaqstan temir joly», Istkomtrans jáne Fesco kólik kompanıalary jetkilikti konteınerlik park qurý máselesin qarastyrýda. Serıalyq óndiristi 2022 jyldyń jeltoqsanynda júzege asyryp, jylyna 10 myń konteınerge deıin óndirý josparlanyp otyr. Máselen, «Qazaqstan Injınırıń», KLMZ «Meıker», SMP Group jáne FESCO otandyq zaýyttar bazasynda 20 jáne 40 fýttyq konteınerler, sondaı-aq rýlondy bolat pen ken júkterine arnalǵan konteınerler óndirisin jolǵa qoıý jumysy júrgizilýde.
«Ónerkásipti damytý qory» otandyq konteınerlerdi óndirýshiler men satyp alýshylar úshin jeńildikpen kredıt berý tetigin iske qosady.
Jalpy, 22 mln tonna eksporttyq júkti konteınerlerge qaıta baǵdarlaý kózdelýde. Bul qosymsha 117 myńǵa jýyq konteınerdi qajet etedi.
Otandyq óndiristi jolǵa qoıý konteınerlerdiń jetkilikti parkin qalyptastyrýǵa, tasymaldardy konteınerleý úlesin 30%-ǵa deıin arttyrýǵa múmkindik beredi.