Elimizde kolektorlyq agenttikterdiń qyzmetine qatysty jańa erejeler kezeń-kezeńimen engizilip jatyr. Bul sharalardyń basty maqsaty – boryshkerlerdiń quqyqtaryn qorǵaý jáne kolektorlardyń qyzmetin tıimdi retteý, dep habarlaıdy aqshamnews.kz.
Jańa erejeler boıynsha, agenttikter boryshkerlerge qaryzdyń satyp alynǵany týraly 30 kún ishinde habarlap, olardyń ótinishterin tirkeýge, ári qarastyrý nátıjelerin qujattaýǵa mindetti. Bul ózgerister jarıalylyqty arttyrý jáne qarjylyq salanyń ashyqtyǵyn qamtamasyz etý maqsatynda engizilgen.
Qarjylyq ashyqtyqty qamtamasyz etý
26 aqpanda bekitilgen qaýlyǵa sáıkes, kolektorlyq agenttikter boryshkerlerdiń ótinishterin mindetti túrde tirkep, olardy zań aıasynda qarastyrýǵa tıis. Mundaı jańalyqtar boryshkerlerdiń shaǵymdary eleýsiz qalmaı, olardyń máseleleri zańdy jolmen sheshilýine múmkindik beredi. Buryndary, boryshkerler ózderiniń beresheginiń basqa uıymǵa ótkenin bilmeı qalatyn edi. Endi bul jaǵdaıdy boldyrmaý úshin agenttikter qaryzdy satyp alǵan sátten bastap 30 kún ishinde boryshkerge habarlaýǵa mindetti.
Kolektorlar men bank arasyndaǵy aıyrmashylyq
Zańger Vıtalıı Kımniń aıtýynsha, eń basty jańalyqtardyń biri – burynǵy erejelerde kolektorlyq agenttikter qaryzdyń satyp alynǵany týraly habarlaýǵa mindetti ýaqyt kórsetilmegen bolatyn. Osy sebepten kóptegen boryshker qaryzdyń kolektorlar qolyna ótkenin bile almaı qalatyn. Qazir osy ózgeristerdiń arqasynda boryshker qaryzdy kolektorlyq agenttikke bergenin jáne odan ári máselelerdi tek solar arqyly sheshýge bolatynyn naqty biledi. Eger boryshkerdiń qaryzdy óteýge múmkindigi bolmasa, ol kolektorlyq agenttikpen qaryz mólsherin azaıtý týraly kelissóz júrgize alady.
30 kún ishinde ótinish berý múmkindigi
Kolektorlyq agenttikterdiń 30 kún ishinde boryshkerge habarlama jiberýi mańyzdy qadam boldy. Osy ýaqyt ishinde boryshker kolektorlyq agenttikke jazbasha ótinish joldaı alady. Bul ótinishte boryshkerdiń qarjylyq jaǵdaıy, otbasylyq jaǵdaıy, tabystary men shyǵystary týraly tolyq málimetter bolýy kerek. Eger boryshker qaryzdy óteýge múmkindigi joq ekenin kórsetse, kolektorlyq agenttikpen qaryz mólsherin azaıtýǵa kelissóz júrgizýi múmkin.
Kolektorlar qaryzdy azaıtýǵa daıyn ba?
Kolektorlyq agenttikterdiń qaryzdy azaıtýǵa daıyn bolatyny ár agenttiktiń saıasatyna baılanysty. Keıbir agenttikter boryshkerge jeńildik jasaýǵa daıyn. Ásirese, olar bank syıaqylaryn jáne aıyppuldardy alyp tastaı otyryp, tek negizgi qaryzdy tóleýdi talap etýi múmkin. Bul kolektorlar úshin tıimdi bolýy múmkin, óıtkeni olar bankten qaryzdy onyń jarty baǵasyna satyp alady. Mysaly, 6 mln teńge qaryzdy 3 mln teńgege satyp alady.
Eger kolektorlar qaryzdy azaıtýǵa bas tartsa, boryshker Qarjy naryǵyn retteý jáne damytý agenttigine (QNRDA) nemese sotqa shaǵymdanýǵa quqyly. Bul jaǵdaıda boryshkerge kolektordyń bas tartý sebepteri men máseleni sheshý joldaryn kórsetý talap etiledi.
Jańa erejeler kolektorlyq agenttikterdiń jumysyna ashyqtyq pen ádildik ákelýi tıis. Boryshkerlerdiń óz quqyqtaryn bilýi jáne olardy qorǵaý múmkindikteri artady. Sonymen qatar, kolektorlar men boryshkerler arasyndaǵy qarym-qatynasty retteý júıesi jaqsaryp, qarjylyq jaǵdaıdy jeńildetý úshin jańa tásilder men avtomattandyrý engizilmek.