Qazaqstandyq joǵary oqý oryndarynda kitaphana isi boıynsha 5 myńnan asa stýdent bilim alýda. Bul týraly QR ǴJBM Joǵary jáne joǵary oqý ornynan keıingi bilim komıtetiniń tóraıymy Gúlzat Kóbenova Hİİ Halyqaralyq ǵylymı-praktıkalyq konferensıadaǵy sózinde málimdedi, dep habarlaıdy almaty-akshamy.kz.
Búgin Qazaq ulttyq qyzdar pedagogıkalyq ýnıversıtetinde «Zamanaýı kitaphana – joǵary oqý ornynyń aqparattyq-kitaphanalyq qyzmet kórsetý sapasynyń kepili» taqyrybynda eki kúndik konferensıa jumysy bastaldy. İs-shara QyzPU 80 jyldyq mereıtoıy aıasynda QR Ǵylym jáne joǵary bilim mınıstrligi, QR Ýnıversıtet kitaphanalarynyń qaýymdastyǵy, L.N.Gýmılev atyndaǵy Eýrazıa ulttyq ýnıversıteti jáne SDÝ ýnıversıtetiniń qoldaýymen ótkizilýde.
QR ǴJBM Joǵary jáne joǵary oqý ornynan keıingi bilim komıtetiniń tóraıymy Gúlzat Kóbenova 2023-2024 oqý jylynda kitaphana kadrlaryn daıarlaýǵa arnalǵan granttar sany 2,5 ese artqanyn atap ótti.
«Elimizdiń 12 joǵary oqý orny «Kitaphana isi» jáne «Aqparatty óńdeý jáne muraǵat isi» baǵdarlamalary boıynsha kadrlardy daıarlaýda. Bilim alýshylar sany 5 myńnan astam adamdy quraıdy. 2023-2024 oqý jylynda kitaphana isi qyzmetkerlerin daıarlaýǵa 123 grant bólindi, bul kórsetkish 2,5 esege óskenin kórsetedi. Ýnıversıtetter jyl saıyn eńbek naryǵyna taldaý júrgizedi, sonyń negizinde jańa jáne ınovasıalyq baǵdarlamalar ázirlenedi. Búgingi tańda otandyq joǵary oqý oryndarynda 225 kitaphana jumys isteıdi. Kitaptardyń sany 55 mıllıon dana, onyń ishinde qazaq tilinde – 23 mıllıon, orys tilinde – 29 mıllıon, basqa tilderde – 2 mıllıon», – dedi Komıtet tóraıymy.
Konferensıa barysynda zamanaýı ýnıversıtet kitaphanasy jáne joǵary bilim men ǵylymdy aqparattyq-kitaphanalyq qamtamasyz etýdiń damý tendensıalary, qyzmet kórsetý sapasyn qamtamasyz etýdiń baǵdarlamalyq-tehnıkalyq sheshimderi jáne aqparattyq-kitaphanalyq qyzmet kórsetý sapasyn baǵalaýdyń zamanaýı ádisteri talqylandy.
Kitaphana qaýymdastyqtary men mekemeleriniń Halyqaralyq Federasıasynyń (IFLA) Azıa jáne Okeanıa boıynsha aımaqtyq fılıaly komıtetiniń tóraǵasy Lın Lı So kitaphana isiniń mamandaryna aldaǵy ýaqytta ótetin mańyzdy sharalar jaıly aqparat berdi.
«Aldaǵy aılarda biz birneshe vebınar uıymdastyramyz, olardyń maqsaty qazirgi zamanǵy kitaphana qyzmetiniń ózekti baǵyttary boıynsha kitaphana qyzmetkerleriniń kásibı quzyretterin jetildirý bolyp tabylady. Biz klımattyń ózgerýi jáne tabıǵı apattardy josparlaý, sırek materıaldar men basylymdardyń saqtalýyn qamtamasyz etý, únemi ózgerip otyratyn sıfrlyq álemde aqparatty tıimdi izdeý quraldary sıaqty mańyzdy qoǵamdyq jáne kásibı taqyryptardy qarastyramyz. Sonymen qatar osy jyldyń 30 qyrkúıegi men 3 qazany aralyǵynda sizderdi aqparattyq prosesterdegi bolyp jatqan ózgeristerdi zertteý jáne taldaý maqsatynda Avstralıada ótetin IFLA samıtine qatysýǵa shaqyramyz», – dedi Sıngapýr Ulttyq kitaphanasy Keńesiniń seriktestik bóliminiń dırektory.
Halyqaralyq sharaǵa elimizdiń 14 qalasynan 44 joǵary oqý ornynan qatysyp jatyr. Alys jáne jaqyn shetelderden (AQSH, Sıngapýr, Shveısarıa, Túrkıa, Reseı, Qyrǵyzstan, Ózbekstan, Tájikstan, Túrkimenstan) 28 maman keldi.