Elimizde «Brakoner» aksıasy ótip jatyr. Maqsat - kıikterdi zańsyz aýlaýdan qorǵaý. Atalǵan sharany Ekologıa jáne ishki ister mınıstrligi birlesip ótkizýde, dep habarlaıdy Almaty-akshamy.kz QazAqparatqa silteme jasap.
«Elimizde kıikterdi qorǵaý operasıasy bastaldy. Ol úshin Ekologıa mınıstrliginiń aýmaqtyq bólimsheleriniń qyzmetkerleri men polıseılermen birlesken 203 mobıldi top quryldy. Operasıa barysynda ańshylyq sharýashylyqtary, ormandar men janýarlar dúnıesin qorǵaý jónindegi memlekettik mekemelerdiń aýmaqtary, sondaı-aq erekshe qorǵalatyn tabıǵı aýmaqtar tekseriledi», - dedi İshki ister mınıstrliginiń ókili Shuǵyla Turlybek vedomstvoda ótken baspasóz máslıhatynda.
Sondaı-aq, mınıstrlik ókili kıikterdi aýlaǵan jaǵdaıda jaýapkershiliktiń baryn eske saldy.
«Kıikterdi zańsyz aýlaý, óndirý, satyp alý, saqtaý, ótkizý, tasymaldaý úshin múlki tárkilenip, 3 jyldan 12 jylǵa deıin bas bostandyǵynan aıyrý qylmystyq jaýapkershilik qarastyrylǵan», - deıdi ol.