Bir aptada 399 qarý-jaraq polısıaǵa tapsyrylǵan.
Aksıa áli de jalǵasýda. Bul týraly İshki ister mınıstrliginiń ókili Shuǵyla Turlybek málim etti, dep habarlaıdy Almaty-akshamy.kz.
«Mınıstrlik jyl saıyn ótkizetin zańsyz saqtalǵan atys qarýyn, oq-dárilerdi jáne jarylǵysh zattardy halyqtan satyp alý aksıasy jalǵasýda. Ol 10 sáýirde bastaldy. Bul maqsatqa respýblıkalyq búdjetten 88 mln teńgeden astam qarjy bólindi. Bir apta ishinde ishki ister organdaryna 317 azamat júgindi, olar óz erkimen 399 atys qarýyn, 1,4 myńnan astam qarý tapsyrdy. Halyqtan qarý-jaraq satyp alý sharasy 2008 jyldan beri júrgizilip keledi. Osy ýaqyt ishinde azamattar jalpy somasy 1,9 mlrd teńgege 56 myńnan astam atys qarýy men 2 mln astam patrondy óz erkimen polısıaǵa tapsyrdy», - dedi Shuǵyla Turlybek mınıstrlikte ótken baspasóz máslıhatynda.
Onyń aıtýynsha, qabyldanǵan sharalar tıimdiligin kórsetip otyr. Onyń dáleli sońǵy 5 jylda qarý qoldaný arqyl jasalatyn qylmystar sany azaıǵan.
«Eske sala keteıik, qarý-jaraqty erikti túrde tapsyrǵany úshin respýblıkalyq búdjetten qarýdyń tehnıkalyq jaǵdaıyna baılanysty onyń árbir birligine 34 myńnan 345 myń teńgege deıingi somada tólem jasaý kózdeledi», - deıdi ol.
Qarý-jaraq, oq-dári jáne jarylǵysh zattardy qabyldaý ár aýmaqtyq polısıa mekemesinde júrgiziledi.
«Qaýipsizdikti qamtý maqsatynda vedomstvo tabylǵan jarylǵysh zattar jáne oq-dárilerge ózdiginen áreket jasamaýdy jáne olardy tasymaldaýǵa tyryspaýǵa shaqyrady. Ol úshin polısıaǵa 102 nómirine nemese 112 nómirine telefon arqyly habarlaǵan jón», - dep habarlaıdy İİM-nen.