Byltyr elimizde kedeıler úlesi 4,9% bolsa, bıyl 5,1%-ǵa jetti
Qazaqstanda kedeılik deńgeıi byltyrǵa qaraǵanda kóterile túsken. Atalǵan derekti Eńbek jáne halyqty áleýmettik qorǵaý mınıstri Tamara Dúısenova keltirdi, dep habarlaıdy Almaty-akshamy.kz QazAqparatqa silteme jasap.
«Byltyr elimizde kedeıler úlesi 4,9% bolsa, bıyl 5,1%-ǵa jetti. Demek, kedeıler sany artqan. Joǵary ınflásıa azamattardyń tabysyna aıtarlyqtaı áser etti. Tapqan tabystyń deni (60-70%) azyq-túlikke jumsalady. Nátıjesinde otbasyny odan ári damytýǵa qarjy jetpeıdi. Árıne, kúnkóris deńgeıiniń azaıa túsýi ár otbasyǵa áser etedi», - deıdi Tamara Dúısenova Ortalyq komýnıkasıalar qyzmeti alańynda ótken baspasóz máslıhatynda.
Odan ári mınıstr qandastardy qoldaýǵa qatysty oıyn ortaǵa saldy, dep jazdy QazAqparat.
«Álemde etnıkalyq ımıgrasıamen aınalysatyn tórt el bar, sonyń biri – Qazaqstan. Bul qatarda bizden bólek, Izraıl, Polsha jáne Germanıa bar. Etnıkalyq qandastarǵa arnalǵan jobany ázirleý barysynda atalǵan elderdiń tájirıbesi eskerildi. Oǵan sáıkes ózge elden kelgen qandastardy Otanyna beıimdeý maqsatynda túrli áleýmettik qoldaý, kómek kórsetiledi, ıaǵnı turǵyn úı jáne eńbekpen qamtý degen sekildi. Bizdiń qandastarymyzǵa usynatyn áleýmettik kómegimiz kóp te, az da emes. Olardyń Otanyna beıimdelýi úshin kórsetiletin alǵashqy kómek deýge bolady», - deıdi vedomstvo basshysy.