Oqý-aǵartý mınıstri Ǵanı Beısembaev Úkimet otyrysynda Memleket basshysy Qasym-Jomart Toqaevtyń tapsyrmalary aıasynda jarıalanǵan «Jumysshy mamandyqtary jylyna» sáıkes is-sharalar jospary ázirlengenin habarlady.
Ol Úkimet janynan komısıa qurylǵanyn, tehnıkalyq jáne kásiptik bilim berýdi transformasıalaýdyń jol kartasy qabyldanǵanyn, barlyq 20 óńirde jumysshy kásipteriniń bedelin jáne kadrlar daıarlaý sapasyn arttyrýǵa, jumys berýshilermen ózara is-qımyldy kúsheıtýge baǵyttalǵan josparlar bekitilgenin atap ótti.
Mınıstr sonymen qatar osy jumys aıasynda kásibı baǵdar berýdiń jańa tujyrymdamasy iske qosylatynyn aıtty.
Ol osy baǵyttaǵy jumysty júıeli damytý úshin óńirlerdiń kadrlarǵa degen qajettiligin eskere otyryp, barlyq oblysta «Jańa mamandyqtar atlasy» ázirlenetinine toqtaldy.
«Kásiptik baǵdar berýdiń jańa tásilderi oqýshylarǵa eńbek naryǵyndaǵy jańa talaptar týraly bilýge, ekonomıkanyń naqty sektorlaryndaǵy mansap perspektıvalaryn baǵalaýǵa jáne mamandyqtardy durys tańdaýǵa múmkindik beredi. Bul úshin mektepterdegi kásibı baǵdarlaý qyzmeti kúsheıtiledi, osy arqyly oqýshylardy tolyǵymen kásibı dıagnostıkamen qamtylady», — dep atap ótti Ǵanı Beısembaev.
Kásiporyndar men kolejderdiń yntymaqtastyǵy arqyly 1 myń mektepte beıindik synyptar ashylatyny atap ótildi. Joǵary synyp oqýshylaryn praktıkalyq daǵdylarǵa jáne kolejder bazasynda alǵashqy jumys kásibine oqytý tájirıbesi engiziledi.