Bıznestegi áıelderdiń úlesi 43,3%-dy quraǵan.
Qazaqstanda óz isin ashyp, kásipker atanǵan áıelder sany artyp keledi, dep habarlaıdy Almaty-akshamy.kz Inbusiness.kz silteme jasap.
Kásipker áıelderdiń ekonomıkalyq belsendiligin qoldaý maqsatynda 2002 jyldan bastap áıelder kásipkerligin qoldaý sharalary júzege asyrylýda. Osy ýaqyt ishinde ondaǵan myń áıel oqýdan ótip, jeńildetilgen nesıe alyp, óz bıznesin ashty.
Bul týraly aýyldaǵy áıelder kásipkerligin qoldaý jónindegi konferensıada Ulttyq ekonomıka mınıstrligi kásipkerlikti memlekettik qoldaý jáne qorǵaý departamentiniń ókili M.Isaeva aıtty.
Máselen, resmı statısıka derekteri boıynsha, eger 2010 jyly kásipker áıelderdiń sany nebári 73,4 myńdy nemese kásipkerlerdiń jalpy sanynyń 26%-yn qurasa, 2021 jylǵy 1 qańtardaǵy jaǵdaı boıynsha, kásipker áıelderdiń sany 587,3 myńǵa jetti nemese SHOB-taǵy áıelderdiń úlesi 43,3%-dy qurady.
«Áıelder kóbine kóterme jáne bólshek saýdada jumys isteıdi. Odan keıin jyljymaıtyn múlik operasıalary, óńdeý ónerkásibi, qarjylyq jáne saqtandyrý qyzmetteri, bilim berý salasy jáne densaýlyq saqtaý men áleýmettik qyzmetterde eńbek etedi», - deıdi Isaeva.
Aýyl salasyndaǵy áıelder kásipkerligin damytýdyń basym baǵyttaryna aýyl sharýashylyǵy ónimderin daıyndaý, qaıta óńdeý jáne saqtaý, veterınarıalyq qyzmetter kórsetý, sondaı-aq kıim, trıkotaj buıymdaryn óndirý, qyzmet kórsetý salasy jáne basqalar jatady.