Baǵanyń ósýine BZJQ-daǵy jınaq salymy «jetkilikti sheginiń» ózgerýi áser etedi
Jaqyn aralyqta elimizdegi baspana baǵasy 10-15% qymbattaıdy. Bul týraly Qazaqstan jyljymaıtyn múlik federasıasynyń basshysy Ermek Músirepov LS-ge bergen suhbatynda aıtty, dep habarlaıdy Almaty-akshamy.kz.
Onyń aıtýynsha, baspana baǵasynyń birden ósýine 2022 jyldyń 1 qańtarynan bastap BZJQ-daǵy jınaq salymy «jetkilikti sheginiń» ózgerýi áser etedi.
«Jańa shektiń engizilýine 27 kún qaldy. Osy kúnderi biz zeınetaqy baǵdarlamasyna qatysyp jatqandardyń úlken dúrbeleńi oryn alady. Olardyń kóbi zeınetaqy qoryndaǵy qarjysyn alýdy kelesi jylǵa shegerip otyrǵandar. Qor «jetkilikti shekti» bulaı birden kóterip jiberedi dep eshkim oılamady. Osyǵan baılanysty bastapqy jáne qaıtalama turǵyn úılerdiń ıeleri baǵa boıynsha alypsatarlyq jasaıdy, sonyń saldarynan baspana baǵasy 10-15%-ǵa ósedi»,-deıdi Músirepov.
Sarapshynyń aıtýynsha, baspana boıynsha dúrbeleń elimizdiń barlyq aımaǵynda oryn alady.
«Adamdar jyljymaıtyn múlikti alyp, ony paıdalanatyn bolady. Olar baspanaǵa jetý úshin jyldardy kútip otyrmaıdy, óıtkeni erteń ne bolatynyn eshkim bilmeıdi. Turǵyndar megapolısten baspana ala almasa, baǵasy tómen ózge aımaqtardan ala bastaıdy»,-dedi ol.
Músirepovtyń aıtýynsha, úı baǵasy kelesi jyldyń kóktemine qaraı biraq turaqtaýy múmkin. Óıtkeni ol kezde zeınetaqy qoryndaǵy qarajat jyljymaıtyn múlikke áser etýin qoıady. Sondaı-aq, qordaǵy qarajatyn paıdalana alatyn adamdar sany da azaıady.
Degenmen, kóktemde jańa trend paıda bolýy da múmkin, bul sharshy metrdiń qunyna da áser etedi.
«Inflásıaǵa baılanysty halyqtyń ıpoteka alýǵa aqshasy jetpeı qalýy múmkin. Olar nesıeden sharshaǵandyqtan jáne kirister azaıyp bara jatqandyqtan bul páterlerdi naryqqa usyna bastaıdy»,-degen boljam jasady Músirepov.
Onyń aıtýynsha, Qazaqstannyń jyljymaıtyn naryǵyn dál boljaý múmkin emes, óte tez ózgerip otyrady. Memleket tarapynan qolǵa alynǵan jańa bastamanyń barlyǵy jyljymaıtyn múlik baǵasyna áser etip otyrady. Pandemıa men karantın sharalary aldymen jyljymaıtyn múlik naryǵyn quldyratqan, keıin qalypyna keltirip, endi qaıta quldyratýy múmkin.
«Baǵa saıasaty osylaı bolady, ázirge jyljymaıtyn múlik naryǵynda turaqtylyq joq, biraq odan úmittimiz»,-dedi ol.
Aıta ketsek, elimizde 2022 jyldan bastap zeınetaqy qoryndaǵy alýǵa bolatyn jınaqtyń «jetkilikti shegi» kóteriledi.
BZJQ-nyń málimeti boıynsha, 2021 jyldyń 25 qarashasyna deıin 516,7 myń adam zeınetaqy jınaǵyndaǵy qarjysyn baspana alýǵa jumsaǵan. Olardyń shotyna 2 trln teńgeden astam qarjy aýdarylǵan. Birjolǵy zeınetaqy tólemderiniń ortasha mólsheri 3,9 mln teńge bolǵan.