Temirjol kóligimen júk tasymaly 10%-ǵa ósken.
Qazaqstan Úkimetiniń málimeti boıynsha, júk tasymaly kólemi ótken jylmen salystyrǵanda birshama artqan, dep habarlaıdy Almaty-akshamy.kz.
«2022 jyldyń alǵashqy eki aıynda elimizde júk tasymaly kólemi ótken jylmen salystyrǵanda birshama artty. Atap aıtqanda, temirjol kóligimen júk tasymaly 10%-ǵa ósip, 70,8 mln tonnany, tranzıttik júkterdi tasymaldaý 20%-ǵa artyp, 4 mln tonnany qurady. Sonymen qatar, konteınerlermen tasymal 12%-ǵa ulǵaıyp, 174,7 myń jıyrma fýttyq balamaǵa jetti», - delingen Indýstrıa jáne ınfraqurylymdyq damý mınıstrliginiń baspasóz qyzmetiniń habarlamasynda.
Júk tasymaly kóleminiń óskeni týraly Úkimet otyrysynda Indýstrıa jáne ınfraqurylymdyq damý mınıstri Qaıyrbek Óskenbaev aıtyp berdi.
Mınıstr óz baıandamasynda bıyl aldymyzda temirjolmen júk tasymaly kólemin 420 mln tonnaǵa, tranzıt tasymaldardy 24,5 mln tonnaǵa jáne konteınerler tranzıtin 1,1 mln jıyrma fýttyq balamaǵa jetkizý mindeti turǵanyn atap kórsetti.
Jalpy, elimizdiń tranzıttik-kóliktik áleýetin damytýdyń negizgi kórsetkishteri «Qýatty óńirler – el damýynyń draıverleri» ulttyq jobasynda aıqyndalǵan. Soǵan sáıkes, 2025 jylǵa deıin Qazaqstanda tranzıttik tasymal kólemi 30 mln tonnaǵa deıin jetýi tıis. Osy maqsatta temirjol ınfraqurylymyn salý, jyljymaly quramdy jańartý, júkterdi konteınerlendirý, balama baǵyttar men halyqaralyq dálizderdi damytý boıynsha sharalar qabyldanyp jatyr.