Qazaqstan Úkimetiniń otyrysynda beıindi vedomstvolardyń basshylary kúzgi dala jumystarynyń dızel otynymen qamtamasyz etilýi týraly aıtty.
QR Aýyl sharýashylyǵy mınıstri Erbol Qarashókeevtiń aıtýynsha, egin jınaý jumystaryn ýaqytyly júrgizý úshin aýyl sharýashylyǵy taýaryn óndirýshilerge 423,5 myń tonna jeńildetilgen dızel otyny bólingen, dep habarlaıdy Almaty-akshamy.kz.
Energetıka mınıstrligimen birlesip, oblys operatorlaryn MÓZ-ge bekitý kestesi bekitildi. Shilde kólemderin óńirler tolyǵymen tańdap aldy. Qazirgi ýaqytta tamyz kólemi jóneltilýde.
«Energetıka mınıstrligi tamyz aıynda munaı óńdeý zaýyttarynan ortasha naryqtyq baǵany belgiledi - tonnasyna 212 myń teńge nemese lıtrine 177 teńge. Operatorlardyń shyǵystaryn eskere otyryp, respýblıka boıynsha ortasha baǵa lıtrine 202 teńgeni quraıdy, bul naryqtyq baǵadan 15-20%-ǵa arzan», - dedi Erbol Qarashókeev.
Óz kezeginde QR Energetıka mınıstri Bolat Aqsholaqov shildede aýyl sharýashylyǵy muqtajdyqtary úshin 106,6 myń tonna tıelgenin, tamyzda 148,2 myń tonnaǵa tólengenin aıtty.
«Aýyl sharýashylyǵy taýaryn óndirýshilerge munaı óńdeý zaýyttarynan dızel otynyn jetkizý basym negizde júzege asyrylady. Mınıstrlik jóneltimderge turaqty monıtorıń júrgizýde. Aýyl sharýashylyǵy taýaryn óndirýshiler úshin baǵa resýrs ustaýshylardyń kelisimi boıynsha tonnasyna 222 myń teńge nemese lıtrine 184 teńge deńgeıinde anyqtaldy», - dedi Bolat Aqsholaqov.