Aıtarlyqtaı perspektıvalar bar.
Ekologıa, geologıa jáne tabıǵı resýrstar mınıstrligine qarasty Geologıa komıtetiniń tóraǵasy Talǵat Satıev málimdegendeı, Reseı jáne Qytaımen shekaralas alańdarda jańa qorǵasyn-myrysh ken oryndary ashylýy múmkin, dep habarlaıdy Almaty-akshamy.kz Egemen.kz.
«Qazaqstanda jańa ken oryndaryn ashý úshin aıtarlyqtaı perspektıvalar bar. Aqmola jáne Qostanaı oblystarynyń, ortalyq, shyǵys jáne ońtústik óńirlerdiń alańdarynda altynnyń ken oryndary bar. Ortalyq jáne Ońtústik Qazaqstanda, Kendi Altaıda, sondaı-aq Reseı jáne Qytaımen shekaralas alańdarda jańa qorǵasyn-myrysh ken oryndary ashylýy múmkin», dedi komıtet tóraǵasy Ortalyq komýnıkasıalar qyzmetinde ótken brıfıńte.
Onyń aıtýynsha, elimizde vólfram, molıbden, alúmını, qalaıy sıaqty sırek kezdesetin paıdaly qazbalardyń jańa ken oryndaryn ashý perspektıvalary jeterlik.
«Memleket basshysynyń tapsyrmasyna sáıkes, 2021-2025 jyldarǵa arnalǵan «Geologıa salasyn damytý» baǵytyn qamtıtyn «Qazaqstandyqtardyń ál-aýqatyn arttyrýǵa baǵyttalǵan ornyqty ekonomıkalyq ósý» ulttyq jobasy qabyldandy. Onyń aıasynda zertteýlerdiń jalpy aýdany 2026 jylǵa qaraı 680 myń sharshy shaqyrymnan asady», dedi Talǵat Satıev.