«Ár otbasynan - bir aǵash».
Kóktem kelgende aǵash kóshetterin otyrǵyzý naýqany bastalatyny aıan. Osy oraıda elimizdiń Mádenıet jáne sport mınıstrligi kógaldandyrý jumysyna búkil el bolyp jumylýdy usynyp otyr, dep habarlaıdy Almaty-akshamy.kz QazAqparatqa silteme jasap.
«Naýryz - tazalyq pen ekologıaǵa qamqorlyq merekesi. Bul áleýetti aýqymdy ekologıalyq aksıalar men jalpy óskeleń urpaqty ekologıalyq tárbıeleý úshin paıdalaný qajet. Osy kúni búkil el boıynsha jappaı aǵash otyrǵyzý jáne eldi mekender men aýlalardyń aýmaqtaryn tazartý boıynsha «Taza tabıǵat» respýblıkalyq aksıasy bastalady», - dedi QR Mádenıet jáne sport vıse-mınıstri Nurǵısa Dáýeshov Ortalyq komýnıkasıalar qyzmetinde ótken baspasóz máslıhatynda.
Onyń aıtýynsha, el boıynsha aǵash otyrǵyzý ár óńirdegi aýa raıyna baılanysty júredi.
«Sonymen bir mezgilde búkil el boıynsha áleýmettik jelilerde «Ár otbasynan bir aǵash» chellendjin ótkizý usynylady. Aǵash otyrǵyzý aýa raıynyń jaǵdaıyna qaraı júrgiziledi. Iaǵnı qolaıly jyly kúnder keıinirek keletin aımaqtarda aksıany da keıinirek uıymdastyrýǵa jol beriledi», - deıdi ol.