Jalpy, 2025 jylǵa deıin 11 myń shaqyrymda tólem júıesin kezeń-kezeńimen engizý josparlanyp otyr.
Búgin Májiliste ótken Úkimet saǵatynda sala mınıstri Qaıyrbek Óskenbaev osylaı málimdedi. Onyń dereginshe, qazirgi tańda aqyly joldardyń uzyndyǵy 2 myń shaqyrymnan asqan. Jyl basynan beri jalpy alymdar kólemi 4 mıllıard teńgeni qurady, dep habarlaıdy Almaty-akshamy.kz.
Tarıfke keler bolsaq, jeńil avtomobılder 1 shaqyrym úshin 1 teńge, al júk kólikteri 25 teńge tóleıdi. Jalpy, elimiz boıynsha respýblıkalyq jeliniń 90, al jergilikti mańyzdaǵy joldardyń 80 prosenti normatıvtik jaǵdaıǵa sáıkes keletinin aıtty mınıstr. 2025 jylǵa qaraı olardyń úlesin sáıkesinshe100 jáne 95 paıyzǵa jetkizý josparlanǵan.
«Respýblıkalyq jeli boıynsha 4 myń shaqyrym jolda qurylys jáne qaıta jańartý jumystary júrgizilýde. Shamamen 3 myń shaqyrym jol kúrdeli jáne ortasha jóndeýmen qamtylǵan. Jergilikti jeli boıynsha jóndeýdiń barlyq túrlerimen 4,6 myń shaqyrym avtojol qamtylǵan. Respýblıkalyq búdjetten avtojol salasyn damytýǵa 2022 jylǵa 603 mlrd.teńge bólindi. Memleket basshysynyń tapsyrmasyna sáıkes, biz buryn bastalǵan barlyq jobalardy aıaqtaýymyz qajet. Búginde elimizdegi avtojol salasyndaǵy ondaı jobalardyń sany - 17. Al iske asyrylýy 2024 jylǵa kózdelgen 4 myń shaqyrymdy quraıtyn jol jelisi bar. Jyldyń sońyna deıin shamamen 1 myń shaqyrym joldy paıdalanýǵa berý josparlanyp otyr. Qalǵan 3 myń shaqyrym joldaǵy jumystardy 2023 jyly aıaqtaýdy kózdep otyrmyz», - deıdi QR Indýstrıa jáne ınfraqurylymdyq damý mınıstri Qaıyrbek Óskenbaev.