Pfizer, Çalık Holding, Alarko Holding jáne basqa da sheteldik kompanıalar Qazaqstanda jalpy quny $1,6 mlrd bolatyn jobalar boıynsha jańa kelisimsharttarǵa qol qoıdy
VI Jahandyq ınvestısıalar jónindegi qazaqstandyq dóńgelek ústel (KGIR) aıasynda QR Premer-Mınıstri Álıhan Smaıylovtyń qatysýymen úzdik sheteldik ınvestorlardy marapattaý jáne Qazaqstanda jańa jobalardy iske asyrý boıynsha kelisimsharttarǵa qol qoıý rásimderi ótti, dep habarlaıyd almaty-akshamy.kz
Bıyl úzdik ınvestorlar densaýlyq saqtaý, bilim berý, energetıka, aýyl sharýashylyǵy jáne t.b. sıaqty ekonomıka salalarynda 10 nomınasıa boıynsha marapattaldy.
Onyń ishinde, Knauf Group (uzaqmerzimdi áriptestik), Wabtec Corporation (ınvestısıalyq belsendilik), Eni S.p.A. (turaqty damý), Honeywell (ınovasıalyq óndiris), Coca Cola Içecek Kazakhstan (áleýmettik jaýapkershilik) kompanıalary atap ótildi.
Budan basqa, salalyq marapattar «Aitas KZ» AQ ókilderine – AÓK áleýetin damytýǵa qosqan úlesi úshin, «Ordamed» AQ – densaýlyq saqtaýdy damytýǵa qosqan úlesi úshin,«Nobel AFF» AQ – farmasevtıka salasyn damytýǵa qosqan úlesi úshin, Alarko Holding – ınfraqurylymdyq damýǵa qosqan úlesi úshin jáne «Alageum Electric» AQ-ǵa adamı kapıtaldyń damýyna qosqan úlesi úshin tabystaldy.
KGIR-2023 alańdarynda Premer-Mınıstrdiń qatysýymen AÓK, TMK, densaýlyq saqtaý, jeńil ónerkásip, mashına jasaý, bilim berý, qurylys qospalary men hımıalyq ónimder óndirisi sıaqty ekonomıka salalarynda $1,6 mlrd somasyna 26 memorandým men komersıalyq qujattarǵa qol qoıyldy.
Osylaısha, Pfizer kompanıasy Qazaqstanda Prevenar 20 ınovasıalyq pnevmokok ınfeksıasyna qarsy ekpe óndirisin jolǵa qoıady. Çalık Holding kompanıasy Qostanaı oblysynda burshaq daqyldaryn qaıta óńdeý zaýytyn salady. Alarko Holding bıznes-konglomeraty Shymkent ákimdigimen jylyjaı salý týraly kelisim bekitti. Lasselsberger group qurylys jelimi men qurǵaq qospalar óndirisi keshenin salady. Roche túpnusqa bıotehnologıalyq dári-dármekterdi lokalızasıalaýdy josparlap otyr. Işıklar Packaging kraft-qaǵazyn óndirý zaýytyn salady. Alstom QR-da vagon jóndeý deposy men elektrovozdarǵa qyzmet kórsetý boıynsha bas servıstik ortalyq ashady.
Pfizer, Çalık Holding, Alarko Holding jáne basqa da sheteldik kompanıalar Qazaqstanda jalpy quny $1,6 mlrd bolatyn jobalar boıynsha jańa kelisimsharttarǵa qol qoıdy
Anyqtama: KGIR (Kazakhstan Global Investment Roundtable) forýmyna jyl saıyn álemniń túkpir-túkpirinen iri ónerkásip kásiporyndarynyń basshylary, qarjy sektorynyń ókilderi, saıasatkerler men sarapshylar jınalady. Bıylǵy is-sharaǵa Ulybrıtanıa, Vetnam, Germanıa, Kanada, Qatar, Qytaı, BAÁ, Saýd Arabıasy, AQSH, Túrkıa, Fransıa, Chehıa jáne basqa da birqatar el ókilderi keldi.