Ortasha eseppen 567 myń teńge jalaqy alady.
Qazir elimizde 69,5 myń IT mamany eńbektenip jatyr. Olardyń 21%-y birneshe kompanıada jumys isteıdi. Eńbek jáne halyqty áleýmettik qorǵaý mınıstrligi Eńbek resýrstaryn damytý ortalyǵynyń basqarýshy dırektory Aleksandra Molchanovskaıa otandyq IT mamandaryna qatysty sońǵy derekpen bólisti, dep habarlaıdy Almaty-akshamy.kz QazAqparatqa silteme jasap.
«Búginde elimizde IT mamany ortasha eseppen 567 myń teńge jalaqy alady. Al, baǵdarlama jasaqtaýshylar aıyna 1,5 mln teńgeden astam tabys tabady. Derek kózi kórsetip otyrǵandaı, keıbir kompanıalar IT mamandardy ýaqytsha jaldaıdy, ıaǵnı naqty bir jobany jasaýǵa shaqyrady. Otandyq IT salasyna biz aýqymdy taldaý júrgizdik. Elimizde jáne shetelde atalǵan mamandyqqa suranys joǵary. Sıfrlyq damý mınıstrliginiń málimetinshe, jyl saıyn elimizge 30 myńǵa jýyq IT mamany qajet», - dedi Aleksandra Molchanovskaıa «Qazaqstannyń eńbek naryǵy týraly ekinshi ulttyq baıandama», - delingen onlaın-konferensıada.
Onyń aıtýynsha, búginde Qazaqstanda 69,5 myń IT mamany 84 myń elektrondy eńbek sharty boıynsha jumys istep jatyr. Demek, otandyq IT mamandardyń 21 paıyzy birneshe jerde eńbektenedi.
«Elektrondy eńbek bırjasy bazasynda keıingi 2 jylda 16 myńnan astam bos jumys orny jáne 17 myńnan astam túıindeme júkteldi. Jumys berýshiler tarapynan baǵdarlama jasaqtaýshy mamanǵa suranys joǵary. Sarapshylardyń aıtýynsha, elimizde IT mamandarynyń jetispeýshiligi olardyń deńgeıi jáne tájirıbesine baılanysty. Sol sıaqty tájirıbe kórsetkendeı, IT mamandar jumys izdep asa qınalmaıdy, jumys berýshiler olardy ózderi izdep taýyp jatady», - deıdi ol.
Eńbek resýrstaryn damytý ortalyǵy dırektorynyń dereginshe, Qazaqstanda IT mamandardyń deni megapolısterde eńbektenedi. Al salaǵa kelsek, aldymen aqparat jáne baılanys, ekinshi saýda, úshinshi kezekte qarjy jáne saqtandyrý salasyn qamtıdy.