Qandastardy qabyldaý jáne jaıǵastyrý saıasaty da qaıta qaralatyn bolady.
Qazaqstan Úkimeti kóshi-qondy yntalandyrý úshin qandaı sharalardy iske asyrý kerektigin qarastyryp jatyr, dep habarlaıdy Almaty-akshamy.kz.
«Memleket basshysy Qasym-Jomart Toqaevtyń bıylǵy 1 qyrkúıektegi Qazaqstan halqyna Joldaýynda elimizdiń kóshi-qon saıasatynyń tıimdiligin arttyrý boıynsha jańa sharalar paketi usynyldy. Olardy iske asyrý maqsatynda kóshi-qon saıasatynyń aldaǵy 5 jylǵa arnalǵan jańa tujyrymdamasy sheńberinde ishki kóshi-qondy yntalandyrýǵa baǵyttalǵan birqatar sharalar kózdeletin bolady»,- delingen Eńbekmıni baspasóz qyzmetiniń habarlamasynda.
Memleket basshysynyń ishki kóshi-qon saıasatyn qaıta qaraý jónindegi tapsyrmasyn oryndaý úshin jańa Tujyrymdama sheńberinde eldiń basqa oblystarynda negizdelgen transfert jáne qoldanystaǵy bıznes-jobalardy keńeıtý arqyly jumys oryndaryn qura otyryp, azamattardyń soltústik jáne ortalyq óńirlerge retteletin qonys aýdarýyn uıymdastyrý tetigi kózdeletin bolady.
Osy baǵyt sheńberinde:
- árbir qabyldaýshy oblysta jer resýrstarymen, ınjenerlik, kólik-logıstıkalyq jáne áleýmettik ınfraqurylymdarmen qamtamasyz etýdi eskere otyryp, qonys aýdarýdy yntalandyrýdyń arnaıy óńirlik baǵdarlamasyn ázirleý kózdeledi. Sondaı-aq baǵdarlamalarda jumys kúshiniń tapshylyǵyn sezinetin ekonomıkanyń basym sektorlary aıqyndalatyn bolady;
- jumys oryndaryn qurý boıynsha barynsha áleýeti bar tıisti bıznes-ıdeıalar konkýrsy arqyly soltústik jáne ortalyq óńirler úshin 100 bıznes-jobanyń keısin qalyptastyrý máselesi pysyqtalýda;
- Jambyl oblysynyń oń tájirıbesin eskere otyryp, ortalyq jáne soltústik óńirlerde óndiriske jáne tehnıkamen qamtamasyz etýge jeńildetilgen kredıtter arqyly aýyl sharýashylyǵy kooperasıalaryn qurý jáne keńeıtý kózdeledi;
- jumys berýshi jumysqa ornalasý faktisin rastaǵan jaǵdaıda, qonys aýdarýshylar úshin jańa jerdegi turǵyn úı qunynyń 50% - y mólsherinde (beriletin turǵyn úıdiń ornyna) qarjylyq kómek alý quqyǵyn kýálandyratyn utqyrlyq sertıfıkattaryn engizý josparlanýda. Bul soma turǵyn úı salýǵa nemese satyp alýǵa, sondaı-aq Otbasy bankine bastapqy jarnany engizýge baǵyttalýy múmkin.
Memleket basshysynyń tapsyrmasyn oryndaý maqsatynda jańa Tujyrymdama aıasynda tarıhı otanynda qandastardy qabyldaý jáne jaıǵastyrý saıasaty da qaıta qaralatyn bolady.
Atap aıtqanda, qujattardy qabyldaý kezeńinde qandastyń keletin jerin aıqyndaý tetigin engizý jáne osy óńirde turaqty turýdyń belgili bir merziminen keıin azamattyq bere otyryp, eńbek kúshi tapshy óńirlerge kóshýdi retteý men yntalandyrý jóninde sharalar qabyldaý kózdeledi.
Bul tásil Germanıada, Izraılde jáne Reseıde otandastardyń jergilikti qoǵamǵa ıntegrasıalaný prosesterin retteý jáne ulttyq ekonomıkanyń qajettilikterin eskere otyryp, olardyń áleýetin paıdalaný úshin sátti qoldanylady.
Budan basqa, tarıhı Otanymen baılanysty nyǵaıtý maqsatynda joǵary deńgeıdegi mamandar nemese óz elderinde tabysty bıznes-keısterdi iske asyrǵan jáne olardy Qazaqstanda masshtabtaýǵa nıet bildirgen etnıkalyq qazaqtarǵa (basqa elderdiń azamattaryna) arnalǵan Qazaq kartasyn engizý jáne ony berý usynylady.
Osy Kartanyń ıesi saıası quqyqtardy qospaǵanda, turý quqyǵymen birdeı bolatyn elge jeńildetilgen kirý quqyǵyn (bıznes ashý, jyljymaıtyn múlikke jáne basqa múlikke ıelik etý, qarjylyq operasıalardy júrgizý) ıelenedi.