Oǵan qosa osy dertke shaldyqqan balalar men jasóspirimder kóp.
Bul jóninde Almatyda ishektiń qabyný aýrýlary jónindegi Respýblıkalyq kúzgi mektep aıasynda ótken konferensıada aıtyldy, dep habarlaıdy Almaty-akshamy.kz 24.kz-ke silteme jasap.
Otandyq jáne sheteldik mamandar búgingi tańda dıagnostıkalaýdyń ári emdeýdiń zamanaýı ádisteri arqyly bul aýrýdy asqyndyrmaı emdeýge bolatynyn aıtady. İshektiń qabyný aýrýlary aýtoımmýndyq dertke jatady. Uzaq stress, ártúrli vırýstyq ınfeksıalar men batys taǵam túrlerin jıi paıdalaný bul aýrýlardyń ósýine ákelip otyr, - deıdi mamandar. Aıta keterligi búginde bul patologıa 40 jasqa deıingi adamdarda jıi anyqtala bastapty.
«Ókinishke oraı bul dıagnoz keıde nárestelerge de qoıylady. Bizdiń maqsatymyz halyq arasynda durys tamaqtanýdy nasıhattaý. Sonymen birge basqa jaǵymsyz faktorlardyń áserin azaıtýǵa kómektesý. Bul qaýipti syrqattan balalar men olardyń otbasy múshelerin qorǵaýymyz qajet», - deıdi «Kardıologıa jáne ishki aýrýlar» ǴZI basqarma tóraǵasynyń orynbasary Jámıla Qaıbýllaeva.
Dárigerler derttiń ishek jarasy jáne Kron aýrýy sekildi eki túri kóp kezdesedi deıdi. Birinshisinde tek toq ishek zaqymdansa, Kron aýrýy kezinde as qorytý júıesiniń kez kelgen bóligi zaqymdanýy múmkin. Birden bir belgisi-dıareıa. Búgingi tańda zamanaýı ádisterdiń arqasynda bul aýrýlardy tıimdi emdeýge bolady.
«Bıyl bizdiń dárigerler zertteýdiń – magnıtti-rezonansty enterografıa, ıntestınoskopıa, ishektiń últra dybystyq zertteýleri sekildi tásilderin engizdi. Bul naýqastyń ishek qurylysyn tolyq zerttep, dárigerlerge naqty dıagnoz qoıyp, tıimdi terapıa taǵaıyndaýǵa kómektesedi», - deıdi «Kardıologıa jáne ishki aýrýlar» ǴZI gastroenterolog-dárigeri Aınash Tanabaeva.
Qazir elimizde ishektiń qabyný aýrýlaryna shaldyqqan pasıentterdiń biryńǵaı tizimi jasalýda. Bul eldegi jaǵdaı týraly naqty málimet alyp, dárigerlerge naýqastardy der kezinde jáne tıimdi emdeýge múmkindik beredi.