Bolashaqta júzdegen ǵalymdar men myńdaǵan týrısi qabyldaıtyn bolady.
Qazaqstanda ǵaryshqa ushý modelderin zertteý jáne ǵylymı synaqtar júrgizetin eksperımenttik qurlyq keshenin qurý josparlanǵan. Bul týraly Tashkentte ótken «Space Technology Sonference Central Eurasia» konferensıasynda «Qazaqstan ǵarysh sapary» UK« AQ basqarma tóraǵasy Aıdyn Aıymbetov aıtty, dep habarlaıdy Almaty-akshamy.kz QazAqparatqa silteme jasap.
«Ǵarysh salasy – elimiz úshin ǵylym men tehnıkanyń tyń baǵyty, ǵaryshtyq tehnologıalar, geofızıka, medısına jáne bıologıa, bıotehnologıalar jáne irgeli ǵylymdar salasyndaǵy ǵylymı synaqtar ǵarysh jetistikterin kez kelgen qyzmet salasyna endirýge múmkindik beredi», - dedi Aıdyn Aıymbetov.
«Qazaqstan ǵarysh sapary» kompanıasynyń málimetinshe, eksperımenttik qurlyq kesheni ǵarysh stansasynyń bir bóligi túrinde turǵyzylyp, onda zertteýshiler uzaq merzimdi synaqtar júrgizedi. Modýldiń jumysqa jaramdylyǵyna jergilikti tirshilikti qamtamasyz etý júıeleri jaýap beredi. Keshen ǵaryshtaǵy jaǵdaıǵa barynsha jaqyndatylady. Zertteý qatysýshylary sol ortada jumys isteıtin bolady.
Keshenniń negizgi mindetterine ǵarysh qyzmetiniń tynys-tirshiligin qamtamasyz etý júıelerin, medısınalyq profılaktıka quraldaryn, ekıpajdyń jumysqa qabilettiligi men sergektigin, ekıpajdyń derbestigin, oqshaýlaný saldaryn jáne onymen baılanysty fızıologıalyq stressorlardy zerdeleý kiredi.
«Ortalyq Azıadaǵy alǵashqy ǵaryshtyq zertteý modýli kóptegen entýzıast jandardyń armanyn júzege asyrýǵa múmkindik beredi. Ǵaryshqa ushý baqyty búkil álemde ondaǵan adamdarǵa ǵana buıyrýy múmkin. Al qazaqstandyq eksperımenttik keshen bolashaqta júzdegen ǵalymdar men myńdaǵan týrısi qabyldaıtyn bolady», - dedi jobanyń seriktesi Eurasian Space Ventures jeke ǵarysh kompanıasynyń negizin qalaýshy Shýhrat Ibragımov.
«Qazaqstan ǵarysh sapary» kompanıasynyń aqparatyna súıensek, eksperımenttik qurlyq kesheniniń syrtqy jáne ishki túri qazirgi ýaqytta qarqyndy pysyqtalyp jatyr jáne bıyl tanystyrylatyn bolady.