Armenıanyń Qazaqstandaǵy Tótenshe jáne Ókiletti Elshisi Armen Gevondán Frankofonıa kókteminiń 15-maýsymy mádenı-gýmanıtarlyq sıpattaǵy kezekti oqıǵa emes ekendigin, Qazaqstanda jyl saıyn fransýz tili men mádenı alýandyǵyn ilgeriletý, bilim berý men qaıta daıarlaýdy yntalandyrý, mádenıetter men órkenıetter dıalogyn jandandyrý tóńireginde elder men halyqtardy biriktirýge, yntymaqtastyqty nyǵaıtýǵa baǵyttalǵan is-sharalar ótkiziletinin atap ótti.
«Frankofonıa – bul halyqtarǵa mádenıetti tereńirek qabyldaýǵa múmkindik beretin, sol arqyly memleketaralyq yntymaqtastyq palıtrasyn baıytatyn mádenıetter, dástúrler, erekshe ádet-ǵuryptardyń tyǵyz toǵysýy. Sońǵy jyldary Armenıa men Halyqaralyq frankofonıa uıymy arasyndaǵy yntymaqtastyq jańa serpin aldy, bul uıymnyń ótken 2024 jylǵy samıtinde de aıtyldy. Armenıada Frankofonıanyń onynshy sporttyq jáne mádenı oıyndaryna daıyndyq júrip jatyr, ony 2027 jyly 23 shildeden 1 tamyzǵa deıin Erevanda ótkizý josparlanǵan. Bul orasan zor oqıǵa Frankofonıa elderimen dostyq qarym-qatynasty nyǵaıtyp qana qoımaı, Armenıada fransýz tiliniń taralýyna eleýli úles qosý úshin uıymdastyrylmaq», – dedi Armenıa elshisi.
Armen Gevondánnyń aıtýynsha, bıyl Qazaqstannyń tórt qalasynda – Astana, Almaty, Qaraǵandy jáne Shymkentte kórnekti armán rejıseri Serj Avedıkánnyń «Kútken adam» fılminiń kórsetilimi uıymdastyrylady.
Belgıanyń Qazaqstandaǵy Tótenshe jáne Ókiletti Elshisiniń orynbasary Antýan Bıname festıvál aıasynda qazaqstandyq qalalarda ótkizilip jatqan is-sharalar týraly da aıtty. Ol bıyl Belgıa elshiligi Qazaqstandaǵy Frankofonıa kúnine qýana qatysatynyn atap ótti. İs-sharalar frankofondyq kıno aptalyǵy aıasynda ótedi.
«Biz belgıalyq fılmderdiń kórsetilimderin uıymdastyryp jatyrmyz. Astana men Almatyda «Omen» fılmi kórsetiledi. Qaraǵandyda «Júlı nege úndemeıdi» fılmin kórsetemiz. 18 sáýirde Almatyda qazaq jáne fransýz tilindegi ádebıetke arnalǵan is-shara ótedi. Belgıalyq avtorlar men ıllústratorlar Elen Delforj Kenten Greban onlaın rejıminde ılústrasıalanǵan kitaptar jasaý tájirıbelerimen bólisedi. Osy is-shara aıasynda Qaraǵandyda «Komıkster arqyly Belgıa boıynsha saıahat» kórmesin tamashalaısyzdar. Sondaı-aq «Anashym» atty kitapty qazaq tilinde usynamyz», – dedi Antýan Bıname.
Lıtva Respýblıkasynyń Qazaqstandaǵy Tótenshe jáne Ókiletti Elshisi Egıdıýs Navıkas Lıtva 1999 jyldan beri Halyqaralyq frankofonıa uıymynyń baqylaýshy múshesi bolyp tabylatynyn atap ótti. Fransýz tili - Lıtvada eń kóp taralǵan tórtinshi til. Elde Fransıamen mádenı yntymaqtastyqtyń joǵary deńgeıi baıqalady.
«Men úshin osynda jáne buǵan deıingi qyzmetterimde elshi bola otyryp, «Frankofonıa kóktemine» qatysý árqashan mártebe boldy. Men sizderdi is-sharalarǵa qatysýǵa, fılmder kórýge, gastronomıalyq is-sharalarǵa qatysýǵa shaqyrǵym keledi. Sizder kóptegen qyzyqty jáne jaǵymdy dúnıelermen tanysasyzdar», – dedi ol.