1,8 mln-ǵa jýyq jaldamaly jumyskerdiń aqshalaı kiristeri ósedi.
Memleket basshysynyń bıylǵy 1 qyrkúıektegi Qazaqstan halqyna Joldaýynda aıtylǵan tapsyrmasyna sáıkes, 2023 jylǵy 1 qańtardan bastap eń tómengi jalaqy mólsheri 60 000-nan 70 000 teńgege deıin ulǵaıtylatyn bolady, dep habarlaıdy Almaty-akshamy.kz.
«QR Eńbek kodeksine sáıkes, jumys berýshiler jumyskerlerge eńbekaqyny ETJ-dan tómen emes deńgeıde qamtamasyz etýge mindetti. Osynyń arqasynda ártúrli menshik nysanyndaǵy kásiporyndardyń barlyq salalarynda jumys isteıtin jalaqysy 70 myń teńgege deıingi 1,8 mln-ǵa jýyq jaldamaly jumyskerdiń aqshalaı kiristeri ósedi»,- delingen Eńbekmıni baspasóz qyzmetiniń habarlamasynda.
Birinshi kezekte ETJ kóterilýi «jalaqysy tómen» qyzmetkerlerge qatysty bolady. Ekinshiden, jalaqy deńgeıin belgileý kezinde ETJ kórsetkishin paıdalanatyn jumys berýshiler razrádaralyq biliktilik júıesin eskere otyryp, qyzmetkerlerdiń basqa sanattarynyń jalaqysyn qaıta qaraıtyn bolady.
Sonymen qatar Memleket basshysy QR Úkimetine eń tómengi jalaqyny anyqtaýdyń jańa ádistemesin engizýdi tapsyrdy, bul onyń mólsherin kezeń-kezeńimen arttyrýǵa múmkindik beredi.
Osy tapsyrmany oryndaý úshin QR Eńbek jáne halyqty áleýmettik qorǵaý mınıstrliginiń mamandary dınamıkalyq tásildemege negizdelgen jáne negizgi ekonomıkalyq kórsetkishterdi eskeretin ETJ aıqyndaý ádistemesin ázirleýge kiristi.
ETJ eńbek salasyndaǵy eń tómengi áleýmettik standart bolyp tabylady jáne tıisti qarjy jylyna ár jyl saıyn «Respýblıkalyq búdjet týraly» QR Zańymen belgilenetinin esterińizge sala keteıik.