Bul qyzmetke Nurjan Qudaıbergenov keldi.
Nurjan Qudaıbergenov Almaty oblysy ákiminiń orynbasary qyzmetine taǵaıyndaldy, dep habarlaıdy Almaty-akshamy.kz.
"Almaty oblysy ákiminiń ókimimen jáne Prezıdent Ákimshiliginiń kelisimi boıynsha Nurjan Qudaıbergenov Almaty oblysy ákiminiń orynbasary bolyp taǵaıyndaldy",- delingen oblys ákiminiń baspasóz qyzmetiniń habarlamasynda.
Nurjan Qudaıbergenov 1963 jyly týǵan.
1986 jyly Almaty sáýlet-qurylys ınstıtýtyn «sáýletshi» mamandyǵy boıynsha, 2010 jyly T.Rysqulov atyndaǵy Qazaq ekonomıkalyq ýnıversıtetin «ekonomıka jáne bıznes» mamandyǵy boıynsha támámdaǵan.
Eńbek jolyn 1986 jyly Qazaqstan fosfor óndiristik ǵylymı-zertteý ınstıtýtynyń ınjeneri bolyp bastaǵan.
Ár jyldary «Almaty bas jospary» Memlekettik jobalaý ınstıtýtynyń sáýletshisi, «Sáýlet» shaǵyn sáýlet-óndiristik kásipornynyń sáýletshisi, «Geosáýlet» memlekettik komýnaldyq qazynalyq kásipornynyń ınjener-sáýletshisi, İle aýdany ákimi apparatynyń bas maman – bas sáýletshisi, İle aýdanynyń qala qurylysy jáne qurylys bóliminiń bastyǵy, Tekeli qalasy, Eńbekshiqazaq aýdany ákimderiniń orynbasary, Eńbekshiqazaq aýdany ákiminiń birinshi orynbasary bolǵan.
2019 jyldyń qyrkúıeginen bastap Raıymbek aýdanynyń ákimi qyzmetin atqara bastady.
Aıta ketsek, 23 tamyzda Almaty oblysynyń ákimdiginde kadrlyq aýys-túıis boldy. Oblys ákimi Marat Sultanǵazıev birqatar basqarma basshysyn taǵaıyndady.