Bıyl testileý talaptarynda ózgeris joq
Magıstratýraǵa túsýge arnalǵan keshendi testileýge qatysý úshin tirkeý 18 maýsym kúni bastalady. Tirkeý QR BǴM Ulttyq testileý ortalyǵynyń app.testcenter.kz saıtynda júrgiziledi, dep habarlaıdy Almaty-akshamy.kz. QR BǴM mınıstrliginiń baspasóz qyzmeti taratqan habarǵa silteme jasap.
«Tirkeý kezinde testileý ótkiziletin oryndy oqýǵa túsýshi ózi tańdaıdy. Sondaı-aq Ulttyq testileý ortalyǵynyń saıtynda baıqaý synaǵynan ótýge bolady. Emtıhandar 20 shildeden bastalyp, 10 tamyzǵa deıin jalǵasady», – dedi QR BǴM Joǵary jáne joǵary oqý ornynan keıingi bilim departamentiniń dırektory Ádilet Toıbaev.
Magıstratýraǵa túsý formatyna keletin bolsaq, bıyl eshqandaı ózgeris joq. Testileý nátıjelerimen kelispegen jaǵdaıda testilenýshi KT aıaqtalǵannan keıin 30 mınýttyń ishinde apelásıaǵa ótinish bere alady.
«Magıstratýraǵa túsýge arnalǵan testileý 3 bólimnen turady: shet tili boıynsha test, oqýǵa daıyndyǵyn anyqtaýǵa arnalǵan jáne bilim berý baǵdarlamalary tobynyń beıini boıynsha test. Shet tilin meńgerýdiń jalpy halyqaralyq quzyretterine (standarttaryna) sáıkes shet tilin meńgergenin rastaıtyn bir halyqaralyq sertıfıkaty bar magıstratýraǵa túsýshiler shet tili boıynsha keshendi testileýden bosatylady», – dep atap ótti Ádilet Toıbaev.
Aıta ketken jón, bıyl memlekettik bilim berý tapsyrysy boıynsha magıstratýraǵa túsý úshin shekti bal ózgerissiz qaldy jáne 75 baldy quraıdy, oqýǵa aqyly negizde túsý úshin 50 bal jınaý qajet. Emtıhan tórt saǵatqa deıin jalǵasady.
Esterińizge sala keteıik, bakalavrıat boıynsha granttardyń jalpy sany - 56 561, magıstratýraǵa 13 263, doktorantýraǵa 1890 grant bólingen. Kadrlar daıarlaýǵa arnalǵan granttar suranysqa ıe baǵyttar boıynsha bólinedi.