Jyl basynan beri 7 myńnan astam múgedektigi bar adam jumysqa ornalasty.
Eńbekmıni jyl basynan beri múgedektigi bar qansha adam turaqty jumysqa ornalasqany jaıynda aqparat taratty, dep habarlaıdy Almaty-akshamy.kz.
«2021-2025 jyldarǵa arnalǵan Kásipkerlikti damytý jónindegi ulttyq joba aıasynda 2,2 myńnan astam múgedektigi bar adam turaqty jumys ornyna jáne 5 myńnan astam adam ýaqytsha jumysqa ornalastyryldy. Buǵan qosymsha múgedektigi bar adamdar úshin belgilengen jumys oryndarynyń kvotasy sheńberinde osy jyldyń 1 toqsanynda halyqty jumyspen qamtý ortalyqtarynyń joldamasy boıynsha jumys berýshiler múgedektigi bar 348 adamdy jumysqa qabyldady», - delingen Eńbekmıni baspasóz qyzmetiniń habarlamasynda.
Sonymen qatar bıyl kórý, estý jáne tirek-qımyl apparaty buzylǵan adamdar úshin 71 arnaıy jumys ornyn qurý qarastyrylǵan. Jumys berýshilerdiń jabdyqtalýyna baılanysty shyǵyndaryn sýbsıdıalaý kózdelgen.
Sondaı-aq QR Kásipodaqtar federasıasymen birlesip, múgedektigi bar adamdardy «Halyq baqylaýshylary» retinde tartýdy kózdeıtin áleýmettik mańyzdy «Halyqtyq baqylaý» jobasy iske asyrylýda. Búgingi tańda jobaǵa 164 kásiporyn jumyldyrylyp, 521 qyzmetker jumysqa ornalastyryldy.
Joba aıasynda múgedektigi bar adamdar beınebaqylaý operatorlary retinde jumysqa qabyldanady, olar aýysymmen jumys oryndaryndaǵy eńbek qaýipsizdigi jáne eńbekti qorǵaý talaptarynyń saqtalýyn qadaǵalaıdy.
Jobaǵa qatysý úshin kadrlardy irikteý kezinde múgedektikti (óndiristik jaraqat, kásiptik aýrý, jalpy aýrý) belgileý sebebi boıynsha kásiporynda jumysyn tastap ketken qyzmetkerlerge basymdyq beriledi.
«Halyq baqylaýshylary» Qazaqstan Respýblıkasynyń zańnamasyna sáıkes barlyq tıisti shegerimdermen jáne áleýmettik pakettermen qamtylyp, eńbek sharty boıynsha shtatqa qabyldanady.
Jobany iske asyrý múgedektigi bar adamdar úshin jumys oryndarynyń belgilengen kvotasy aıasynda halyqty jumyspen qamtýǵa múmkindik beredi, bul óz kezeginde erekshe qajettilikteri bar adamdardyń áleýmettik beıimdelýine yqpal etedi.