Jumys izdeýge kómektesedi.
Elektrondyq eńbek bırjasynda kórsetiletin jumyspen qamtý salasyndaǵy qyzmetterdi endi smartfonǵa arnalǵan qosymsha arqyly alýǵa bolady, dep habarlaıdy Almaty-akshamy.kz.
Enbek.kz mobıldi nusqasy saıtpen tolyǵymen sınhrondalǵan jáne qazirdiń ózinde jumys izdeýge kómektesip qana qoımaı, jumyssyz qalǵany úshin áleýmettik tólem alý úshin jumyssyz retinde tirkelýge múmkindik beredi.
«Enbek» mobıldi qosymshasynda paıdalanýshylar ózderin qyzyqtyrǵan bos jumys oryndaryn qarap jáne jumys berýshilerden shaqyrýlar ala alady. Push habarlandyrýlarynyń yńǵaıly múmkindigi túıindeme men jaýaptardy, suhbatqa shaqyrýlardy jáne jumys berýshiniń áńgimelesý nátıjeleri boıynsha sheshimderin qaraý týraly aqparatty ótkizip almaýyna kómektesedi.
«Qosymsha paıdalanýshyǵa túıindemeniń qanshalyqty tolyq toltyrylǵanyn, jumys berýshiniń oǵan nazar aýdarýy úshin taǵy ne qosýǵa bolatynyn aıtady. Al izdenýshini qyzyqtyratyn sala boıynsha jańa bos jumys oryndaryn jiberip almaý úshin izdeý parametrlerin saqtap, qolaıly bos jumys oryndary týraly habarlama alýǵa bolady», – dedi «ERDO» AQ Jumyspen qamtý salasyndaǵy sıfrlyq qyzmetter departamentiniń dırektory Nıkolaı Brúhanov.
Sonymen qatar qosymshada jumyssyz retinde tirkelý jáne jumysynan aıyrylýyna baılanysty áleýmettik tólem alý múmkindigi bar. Ol úshin elektrondyq sıfrlyq qoltańbanyń bolýy qajet emes, tek mobıldi azamattar bazasynda tirkelý jetkilikti.
EEB-da árdaıym memleket sýbsıdıalaıtyn ýaqytsha jumys oryndarynyń keń tańdaýy bar. Olar - qoǵamdyq jumystar, áleýmettik jumys oryndary, jastar praktıkasy, «Alǵashqy jumys orny», «Urpaqtar kelisimsharty» jáne «Kúmis jas» jobalary boıynsha bos oryndar.
«Keleshekte qosymshanyń fýnksıonaldyǵy keńeıip, jańa servıster men qyzmetter qosylady. Qosymsha barlyq paıdalanýshylar úshin tegin jáne PlayMarket jáne AppStore dúkenderinde qoljetimdi», – dedi Nıkolaı Brúhanov.