Bul zańǵa sáıkes, halyqty birneshe jaqsy ózgeris kútip tur.
Memleket basshysy Qasym-Jomart Toqaev «Qazaqstan Respýblıkasynyń keıbir zańnamalyq aktilerine memlekettik jastar saıasaty jáne áleýmettik qamsyzdandyrý máseleleri boıynsha ózgerister men tolyqtyrýlar engizý týraly» zańǵa qol qoıdy, dep habarlaıdy Almaty-akshamy.kz
Zańnyń mátini baspasózde jarıalanady.
Birinshisi – qazaqstandyq áıelder 2028 jylǵa deıin 61 jasta zeınetke shyǵady.
Budan bólek, jasyna baılanysty zeınetaqy tólemderin esepteý úshin tabys shegi 46 eselengen aılyq eseptik kórsetkishten 55 eselengen AEK-ke deıin ulǵaıtylady.
Taǵy bir ózgeris – 35 jasqa deıingi adamdar «jastar» sanatyna kiredi. Depýtattar bul jastardyń áleýmettik belsendiligin arttyrýǵa, optımızmin, erteńgi kúnge degen senimdilik sezimin nyǵaıtýǵa múmkindik beredi jáne halyqaralyq tájirıbege sáıkes keledi dep sanaıdy.
Sondaı-aq ákimdikterge tıisti ákimshilik-aýmaqtyq birliktiń damý basymdyqtaryn eskerip, jastarǵa jeńildikpen jalǵa beriletin turǵyn úı berý jóninde baǵdarlama ázirleý jáne iske asyrý boıynsha jańa quzyret beriledi.
Zańda bala kútimi boıynsha tólemderdi taǵaıyndaý kezeńiniń uzaqtyǵyn 1,5 jasqa deıin ulǵaıtý normasy da qarastyrylǵan. Iaǵnı, kelesi jyldan bastap járdemaqy sábı 1,5 jasqa tolǵanǵa deıin tólenedi.
Buǵan qosa, memlekettik áleýmettik saqtandyrý qorynan jumysynan aıyrylý boıynsha áleýmettik tólemderdiń mólsheri ortasha aılyq tabystyń 45%-na deıin arttyrylady.
Al memlekettik ataýly áleýmettik kómek alýshylarǵa usynylatyn kepildendirilgen áleýmettik paket monetızasıalanady.