Eń tómengi jalaqy mólsheriniń ósýi 41% quraıdy
1 qańtardan bastap Qazaqstanda eń tómengi jalaqy 42,5 myń teńgeden 60 myń teńgege deıin ósedi, dep habarlaıdy Almaty-akshamy.kz Egemen.kz-ke silteme jasap.
Memleket basshysy Qasym-Jomart Toqaev Qazaqstan halqyna jyl saıynǵy Joldaýynda eń tómengi jalaqy deńgeıin arttyrýǵa qatysty tapsyrma bergen bolatyn.
«Álemdik koronakrızıs halyqtyń tabysyna qysymdy kúsheıtti. Budan basqa, eń tómengi jalaqy deńgeıi boıynsha Qazaqstan TMD-nyń birqatar elderinen tómen. Sondyqtan kelesi sheshim qabyldaımyn - 2022 jyldyń 1 qańtarynan bastap eń tómengi jalaqyny aǵymdaǵy 42,5 myńnan 60 myń teńgege deıin ulǵaıtý. Bul shara bir mıllıonnan astam adamǵa, al janama túrde barlyq eńbekshilerge tikeleı qatysty bolady», - dedi Qasym-Jomart Toqaev 2021 jylǵy 1 qyrkúıektegi joldaýynda.
Qazaqstanda 2018 jyldan bastap eń tómengi jalaqy mólsheri kóterligen joq. QR Eńbek jáne halyqty áleýmettik qorǵaý mınıstrligi túsindirgendeı, 2022 jylǵy 1 qańtardan bastap eń tómengi kúnkóris deńgeıi men aılyq eseptik kórsetkishtiń artýy memlekettik búdjetten zeınetaqy men járdemaqy alatyn 5,1 mıllıon adam tabysynyń ósýine ákeledi, al eń tómengi jalaqynyń ósýi ekonomıkanyń barlyq salalarynda jumys isteıtin 1,6 mıllıon adam tabysynyń ósýin qamtamasyz etedi.
Azamattardy qoldaý úshin memlekettik búdjetten júzege asyrylatyn áleýmettik tólemderdiń mólsherin belgileý úshin Qazaqstanda eń tómen kúnkóris deńgeıi jáne aılyq eseptik kórsetkish qoldanylady. Eń tómengi kúnkóris deńgeıi men aılyq eseptik kórsetkish mólsheri ınflásıanyń boljamdy deńgeıin eskere otyryp, jyl saıyn belgilenedi. Osylaısha, úkimet halyqtyń ómir súrý deńgeıiniń tómendeýin boldyrmaý úshin qajetti sharalar qabyldaýda.
«2020 jyly eldegi epıdemıologıalyq jaǵdaıǵa baılanysty KM men AEK mólsheri eki ret, jalpy alǵanda 10%-ǵa ulǵaıtyldy. Bıylǵy jyly olar 5% ındeksteldi, nátıjesinde KM jáne AEK mólsheri tıisinshe 34 302 teńgeni jáne 2 917 teńgeni qurady», - dep habarlady Eńbek mınıstrligi.
2022 jylǵy 1 qańtardan bastap eń tómengi kúnkóris deńgeıiniń shamasyn jáne aılyq eseptik kórsetkishti 5%-ǵa ındeksteý josparlanýda. Nátıjesinde ETKD mólsheri 36 018 teńgeni, al AEK – 3 063 teńgeni quraıdy.
Vedomstvoda sondaı-aq, 2022 jylǵa arnalǵan respýblıkalyq búdjette memlekettiń áleýmettik mindettemelerin oryndaýǵa 4 trln teńge, onyń ishinde zeınetaqy men barlyq áleýmettik járdemaqylardyń mólsherin ındeksteýge 190,4 mlrd teńge qarastyrylatyny habarlandy.
«Bul 4,2 mln adamnyń tabystarynyń artýyna alyp keledi, onyń ishinde:
• 2,3 mln-ǵa jýyq zeınetker, olar yntymaqty zeınetaqylardyń mólsherin 7%-ǵa (ınflásıa deńgeıinen 2%-ǵa oza otyryp) jáne bazalyq zeınetaqy tólemin 5%-ǵa jalpy somasy 138,3 mlrd teńgege;
• 1,9 mln áleýmettik járdemaqy alýshylar, olardyń mólsheri de jalpy somasy 52,1 mlrd teńgege 5% - ǵa arttyrylady», dep atap ótti Eńbek mınıstrligi.
Sondaı-aq, eń tómengi kúnkóris deńgeıiniń artýy ataýly áleýmettik kómek alatyn 900 myńnan astam adamnyń tabys deńgeıine oń áser etedi. Memleket basshysynyń tapsyrmasyn oryndaý maqsatynda 2022 jylǵy 1 qańtardan bastap ETJ mólsheri 42,5 myń teńgeden 60 myń teńgege deıin ulǵaıtylady. Osylaısha, eń tómengi jalaqy mólsheriniń ósýi 41% quraıdy.
Eńbek kodeksine sáıkes jumys berýshiler jumyskerlerge eńbekaqyny ETJ tómen emes deńgeıde qamtamasyz etýge mindetti bolady. Bul shara ártúrli menshik nysanyndaǵy kásiporyndardyń barlyq salalarynda jumys isteıtin 1,6 mln adamnyń aqshalaı tabystarynyń ósýine alyp keledi.
Birinshi kezekte ETJ kóterilýi jalaqysy tómen qyzmetkerlerge qatysty bolady. Ekinshiden, jalaqy deńgeıin belgileý kezinde ETJ kórsetkishin paıdalanatyn jumys berýshiler de qyzmetkerlerdiń basqa sanattarynyń jalaqysyn qaıta qaraıtyn bolady.