Qazaqstan TMD organdaryna sońǵy ret 2015 jyly tóraǵalyq etken
Qazaqstan 2022 jylǵy 1 qańtardan bastap Táýelsiz Memleketter Dostastyǵyna tóraǵalyq etti, dep habarlaıdy Almaty-akshamy.kz Tengrinews.kz-ke silteme jasap.
1991 jyly jeltoqsanda Almatyda ótken keńeste TMD-ny qurý týraly tarıhı deklarasıa qabyldanǵan edi.
Qazaqstan TMD organdaryna sońǵy ret 2015 jyly tóraǵalyq etken.
Aıta keteıik, TMD elderi aldynda turǵan birinshi kezektegi mindetter qatarynda saýda-ekonomıkalyq yntymaqtastyqty jandandyrý men ulǵaıtý bar. Prezıdent Qasym-Jomart Toqaev TMD elderiniń ónerkásiptik kooperasıasyn keńeıtýge basa nazar aýdara otyryp, ekonomıkalyq ózara is-qımyl tásilderin jetildirý qajet ekeni týraly málimdedi. Ol úshin ónerkásiptik keshenderdi damytýdyń keminde 2025 jylǵa deıingi jańa baǵdarlamasyn ázirleýdi jáne qyzmetter saýdasy týraly kelisimge qol qoıýdy usyndy.
Sonymen qatar, Qazaqstan Prezıdenti ortaq agrarlyq naryqty qalyptastyrýdy ózekti dep sanaıdy. Onyń aıtýynsha, TMD elderiniń azyq-túlik júıelerin damytý jáne ózara árekettesý strategıasyn ázirleý ortaq múddege jaýap berer edi. Toqaev pandemıanyń teris saldaryn eńserýdegi yntymaqtastyq máselelerine qatysty TMD keńistiginde vaksınasıa pasporttaryn ózara tanýdy jedeldetýdi usyndy.
Toqaev terorızm, dinı ekstremızm, esirtki saýdasy kóbeıip kele jatqan qaterine birlesip qarsy turýǵa basa nazar aýdara otyryp, qaýipsizdik salasyndaǵy yntymaqtastyq tetikterin jetildirýdi TMD-nyń taǵy bir mańyzdy mindeti dep atady. Onyń aıtýynsha, bul qaýipter Aýǵanstanda qalyptasqan jaǵdaı aıasynda óte mańyzdy.
Qazaqstan Prezıdenti TMD boıynsha áriptesterdi ekologıa jáne qorshaǵan ortany qorǵaý máselelerin ilgeriletýde jáne sheshýde yntymaqtastyqqa shaqyrdy. Ol TMD keńistiginde transshekaralyq ózenderdiń sý resýrstaryn paıdalaný máselelerin sheshý boıynsha naqty qadamdar qabyldaý qajet ekenin atap ótti. Sonymen qatar, ol tómen kómirtekti ekonomıkaǵa kóshý máselesiniń ózektiligin aıtty.
2022 jylǵy mamyrda Nur-Sultanda TMD-ǵa qatysýshy memleketterdiń úkimet basshylary keńesiniń otyrysy ótedi dep kútiledi.