2024 jylǵy 1 qańtardan bastap Memleket basshysynyń tapsyrmasyn iske asyrý maqsatynda Qazaqstanda eń tómen jalaqy mólsheri (budan ári – ETJ) 70 000 teńgeden 85 000 teńgege deıin ulǵaıtyldy.
QR Eńbek kodeksine sáıkes jumys berýshiler jumyskerlerge eńbekaqyny ETJ-dan tómen bolmaıtyn deńgeıde qamtamasyz etýge mindetti, dep habarlaıdy Almaty-akshamy.kz.
Nátıjesinde 85 myń teńgege deıin jalaqy alatyn túrli menshik nysanyndaǵy kásiporyndardyń barlyq salalarynda jumys isteıtin 1,8 mln-ǵa jýyq jaldamaly jumyskerdiń, onyń ishinde búdjet salasyndaǵy 350 myń qyzmetkerdiń aqshalaı kiristeri ósedi.
Birinshi kezekte ETJ arttyrý «jalaqysy tómen» qyzmetkerlerge qatysty bolady. Ekinshiden, jalaqy deńgeıin belgileý kezinde ETJ kórsetkishin paıdalanatyn jumys berýshiler razrádaralyq biliktilik júıesin eskere otyryp, qyzmetkerlerdiń basqa sanattarynyń jalaqysyn qaıta qaraıtyn bolady.
Esterińizge sala keteıik, ETJ eńbek salasyndaǵy eń tómen áleýmettik standart bolyp tabylady jáne jyl saıyn tıisti qarjy jylyna sáıkes «Respýblıkalyq búdjet týraly» QR Zańymen belgilenedi.