Elimizde 2019 jyldan bastap 1 mln-nan astam oqýshy ornyna arnalǵan 1200 jańa mektep qoldanysqa berildi, dep habarlaıdy aqshamnews.kz.
Oqý-aǵartý mınıstrliginiń málimetinshe, 2023, 2024 jyldary qurylys erekshe qarqyndy boldy. Bul kezeńde Memleket basshysynyń tapsyrmasymen 510 myń orynǵa arnalǵan 422 mektep salynǵan bolatyn.
Bul qurylys jumystary elimizde 100-ge jýyq úsh aýysymdy mektepti ǵana emes, 200-den astam mektepterde oryn tapshylyǵyn joıýǵa múmkindik berdi.
Sonyń ishinde «Jaıly mektep» ulttyq jobasy aıasynda jańa formattaǵy mektepter salýǵa basymdyq berilýde. 2024 jyldyń qorytyndysy boıynsha 105 jaıly mektep berildi, 2025 jyldyń sońyna deıin taǵy 112 mekteptiń qurylysyn aıaqtaý josparlanýda.
Sonymen qatar Bilim berý ınfraqurylymyn qoldaý qory arqyly 61 mekteptiń qurylysy qarjylandyryldy, onyń aıasynda taǵy 28 bilim ordasyn salý josparlanýda.
Bilim berý uıymdarynyń ınfraqurylymyn jaqsartýdyń úshinshi baǵyty - jyl saıyn 1000 aýyldyq mektepti jańǵyrtý, sondaı-aq qoldanystaǵy mektepterdi kúrdeli jóndeý, zamanaýı pándik kabınettermen jabdyqtaý júrgizilýde.
«Mektep ınfraqurylymyn keshendi damytý bilim berý úshin jaıly jaǵdaı jasaýǵa jáne barlyq bala úshin turǵylyqty jerine qaramastan sapaly bilimge teń qoljetimdilikti qamtamasyz etýge baǵyttalǵan. Júıeli sharalardyń arqasynda eki jyl ishinde úshaýysymdy mektepterdiń sany úsh esege qysqardy», - deıdi Infraqurylymdy damytý departamenti dırektorynyń orynbasary Roza Sembaeva.
Kelesi kezeńde mektepterdiń ınfraqurylymyn biryńǵaı zamanaýı formatqa kóshirý boıynsha jumystar júrgizilýde. Prezıdenttiń tapsyrmasyna sáıkes, aldaǵy úsh jyl ishinde elimizdiń barlyq óńirinde 1300-ge jýyq mektepti renovasıalaý josparlanýda.