Konstıtýsıa men konstıtýsıalyq zańdarǵa sáıkes, depýtattyń mandaty birqatar quqyqtyq jáne saıası sebepter boıynsha toqtatylýy múmkin.

Aqshamnews.kz redaksıasy joldaǵan resmı saýalǵa jaýap retinde QR Prezıdenti İs basqarmasy Parlament depýtattarynyń ókilettigin toqtatýǵa negiz bolatyn zańdy talaptardy túsindirdi. 

QR Konstıtýsıasynyń 52-babynyń 5-tarmaǵyna sáıkes, Parlament depýtatynyń ókilettigi kelesi jaǵdaılarda toqtatylady:

• depýtat óz erkimen otstavkaǵa ketken;
• qaıtys bolǵan;
• sottyń zańdy kúshine engen sheshimi boıynsha áreketke qabiletsiz, habar-osharsyz ketken nemese qaıtys boldy dep tanylǵan;
• Konstıtýsıa men konstıtýsıalyq zańda kózdelgen ózge de negizder oryn alǵan jaǵdaıda.

Sonymen qatar, depýtat mandatynan aıyrylatyn qosymsha negizder mynalar:

• Qazaqstannan tys jerge turaqty turýǵa ketse;
• oǵan qatysty sottyń aıyptaý úkimi zańdy kúshine ense;
• Qazaqstan azamattyǵynan aıyrylsa.

Májilis depýtattary úshin qosymsha jaǵdaılar:

• ózi saılanǵan saıası partıadan shyqqan nemese shyǵarylǵan bolsa;
• partıalyq tizimmen saılanǵan saıası partıa qyzmeti toqtatylǵan bolsa;
• bir mandattyq okrýgten saılanǵan depýtatty saılaýshylar zańmen belgilengen tártippen keri shaqyrsa.

Sonymen qatar, Konstıtýsıanyń 52-babynyń 3-tarmaǵyna sáıkes, Parlament depýtatyna kelesi istermen aınalysýǵa tyıym salynady:

• basqa ókildi organnyń depýtaty bolýǵa;
• oqytýshylyq, ǵylymı jáne shyǵarmashylyqtan ózge, aqyly qyzmetpen aınalysýǵa;
• kásipkerlikpen shuǵyldanýǵa;
• komersıalyq uıymnyń basqarý organdaryna nemese baıqaýshy keńesine kirýge.

Atalǵan erejeler buzylǵan jaǵdaıda, depýtat ókilettiginen aıyrylýy múmkin.

Buǵan deıin depýtat qandaı jaǵdaıda sózden de, jalaqydan da qaǵylatynyn jazǵan edik.