Barlyq farmasevtıkalyq sanattar arasynda eń joǵary ósý qarqyny parasetamol (30%-dan astam) men antıbıotıkterde (21,6%-ǵa deıin) baıqalǵan. Qazaqstan Respýblıkasy Strategıalyq josparlaý jáne reformalar agenttigi Ulttyq statısıka búrosynyń málimetteri boıynsha, 2023 jyldyń aıaǵynan 2024 jyldyń basyna deıin azıtromısın men «Flemoxin Solutab» baǵasy kúrt kóterilgen, dep habarlaıdy aqshamnews.kz.
Azıtromısın baǵasy qańtar aıynda birden 17,9%-ǵa qymbattaǵan. Aqpan aıynda penısıllındik preparat sanatyndaǵy «Flemoxin Solutab» baǵasy 21,2%-ǵa sharyqtapty. Tipti, sońǵy segiz aıda bul dári-dármek baǵasynyń qymbattaý qarqyny baıqalǵan. Jazdyń sońyna qaraı azıtromısın baǵasy birshama turaqtalǵandaı boldy. Degenmen, preparat qunynyń ósý dınamıkasy qazirdiń ózinde 13,6% quraǵan.
Jalpy, Qazaqstandaǵy dárilik zattardyń bólshek saýda naryǵy aǵymdaǵy jyldyń birinshi jartyjyldyǵynda kólemdik mánde 8,1%-ǵa jáne aqshalaı túrde 21,6%-ǵa ósken. 2023 jyldyń qańtar-maýsym aılarymen salystyrǵanda ósý qarqyny joǵary bolady. Proxima Research International analıtıkalyq kompanıasynyń derekterine súıensek, qazaqstandyqtar dárihanalardan jalpy somasy 326,5 mıllıard teńgege saýda jasap, 253 mıllıon paket túrli dári-dármek satyp alǵan.
Kompanıa mamandary 2024 jyly aqshalaı túrde farmasevtıkalyq naryqtyń damýy «eń aldymen fızıkalyq tutynýdyń ósýimen anyqtalatynyn» atap ótti. 2023 jyly naryq negizinen ınflásıa esebinen ósti. Sarapshylardyń pikirinshe, bólshek saýda osy jyldyń ekinshi jartysynda báseńdeıdi, tipti tómendeýi múmkin.