2023 jyldyń 1 sáýirinen bastap elimizde aıaqkıim ónimderin tańbalaý men qadaǵalaý erejeleri tolyq kúshine endi.
Indýstrıa jáne ınfraqurylymdyq damý mınıstrliginiń málimetinshe, bıyl naýryzda 6 145 348 aıaqkıim tańbalanǵan. Bul aqpan aıyndaǵy kórsetkishten 80%-ǵa (3 365 438) joǵary, dep habarlady Elorda.info.
Sonymen qatar 2022 jylmen salystyrǵandataýarlardy tańbalaý men qadaǵalaýdyń aqparattyq júıesindegi bıznestiń belsendiligi 46%-ǵa ulǵaıǵany baıqalyp otyr.
2023 jyldyń 1 sáýirinen bastap elimizde aıaqkıim ónimderin tańbalaý men qadaǵalaý erejeleri tolyq kúshine endi. Demek, budan bylaı taýarlardy tańbalaý men qadaǵalaýdyń aqparattyq júıesinde (TTQ AJ) tirkelmegen aıaqkıimdi satýǵa tyıym salynady.
Mindetti tańbalaý prosesine aldyn ala daıyn bolý úshin kásipkerlerge eki jyldan astam ýaqyt berildi: 2019 jyldyń 30 maýsymynda qanatqaqty joba iske qosylsa, 2021 jyldyń 1 qarashasynda aıaq kıimdi tańbalaý erejeleri bızneske kóptegen jeńildigi qarastyrylǵan zańnamalyq erejege aınaldy.
Taýarlardy tańbalaý men qadaǵalaý júıesiniń negizgi maqsaty – Qazaqstanda ashyq saýdany damytý. Joǵaryda atalǵan aqparattyq júıede (TTQ AJ) aıaq kıim ónimderiniń kartasyn tirkegensoń oǵan qatysty aqparat paıda bolady. Sonyń negizinde ónimniń biregeı tańbalaý kody qalyptasady. Sol arqyly ár aıaq kıimniń danasy jeke, ıaǵnı bólek qadaǵalanady.
«Birinshiden, tańbalaý prosesi tutynýshylardyń quqyqtaryn qorǵaýǵa baǵyttalǵan. Bul arqyly satyp alýshy qajetti ónim týraly tolyq aqparatqa qanyǵyp, tańdaý quqyǵyn ıelenedi. Tańbalaý men qadaǵalaýdyń ekinshi mańyzdy maqsaty – kóleńkeli ekonomıkany tejeý. Iaǵnı, zańsyz ımportty jáne oǵan qatysty naryqty joıý kózdelip otyr», - dedi QazTextileIndustry (derbes basqarý uıymy) ulttyq jeńil ónerkásip qaýymdastyǵynyń basqarma tóraǵasy Gúlmıra Ýahıtova.
Byltyr elimizde qańtar-naýryz aralyǵynda 223,9 myń dana aıaqkıim shyǵarylsa, bıyl onyń mólsheri 421,5 myńǵa jetken. Óndiristik dınamıka 88%-ǵa artqan.
Eske sala keteıik, Qazaqstanda sıfrly tańbalaý men qadaǵalaý tetigi 3 ónim túrlerine qoldanylyp keledi. Atap aıtsaq, 2020 jyldan bastap temeki ónimderine, 2021 jyldyń qarashasynan bastap aıaqkıim ónimderine, sondaı-aq byltyrǵy qarasha aıynan beri 90 dárilik zatqa qoldanylyp jatyr.