8 tamyzdan bastap ótinimder qabyldana bastaıdy.
Qazaqstan Úkimeti bıznes bastaǵysy keletin azamattarǵa qarjylaı kómek berýge daıyn. Osy maqsatta ulttyq joba aıasynda grant bólinedi, tamyzdyń 8 bastap ótinimder qabyldana bastaıdy, dep habarlaıdy Almaty-akshamy.kz.
«Business.enbek.kz portalynda 2022 jylǵy 8 tamyzdan bastap 2021-2025 jyldarǵa arnalǵan kásipkerlikti damytý jónindegi ulttyq joba sheńberinde bıznes-ıdeıalardy iske asyrý úshin memlekettik granttar alýǵa ótinimder qabyldaý bastalady», - delingen Eńbekmıni baspasóz qyzmetiniń habarlamasynda.
Memlekettik grant – nysanaly maqsaty jańa bıznesti iske qosý jáne damytý bolyp tabylatyn óteýsiz berilgen bastapqy kapıtal.
Grant kólemi 400 AEK-ti (1 225 200 teńge) quraıdy. Ár qatysýshy ony tek bir ret ala alady.
Granttar qarajaty isin jańa bastaǵan kásipkerlerge ózderiniń bıznes-áleýetin ashýǵa, óndiristi jolǵa qoıýǵa jáne damytýǵa, sol arqyly ózin turaqty tabyspen qamtamasyz etýge múmkindik beredi.
Ótinim berý úshin qajet:
- Portalda tirkelý;
- grant alý sharttaryna sáıkestigine tekserýden ótý;
- bıznes-jospar úlgisin júktep alyp, ony toltyrý jáne portalǵa engizý;
- ótinish nysanyn toltyrý jáne ESQ kiltimen qol qoıý.
Internetke nemese kompúterge qoljetimdilik bolmaǵan jaǵdaıda, halyqty jumyspen qamtý ortalyqtarynyń ózine-ózi qyzmet kórsetý aımaqtarynda, halyqqa qyzmet kórsetý ortalyqtarynda, kásipkerlerge qyzmet kórsetý ortalyqtarynda ótinim berýge bolady.
Grant alý úshin birqatar sharttardy saqtaý qajet.
Jańa bıznes-ıdeıany iske asyrýǵa memlekettik grant alýǵa úmitker bola alady:
- tirkelgen jumyssyzdar;
- jeke kásipkerler (tirkeý merzimi 3 jylǵa deıin);
- biryńǵaı jıyntyq tólemdi tóleýshiler.
Bul rette úmitker tómendegi áleýmettik sanattardyń birinen bolý kerek:
- múgedektigi bar adamdar;
- qoldanystaǵy «kandas» mártebesi bar adamdar;
- óńiraralyq qonys aýdarýshylar
- az qamtylǵan otbasy músheleri;
- kóp balaly otbasy múshesi (jubaıy/zaıyby);
- múgedektigi bar balany tárbıelep otyrǵan adam (jubaıy/zaıyby);
- asyraýshysynan aıyrylý boıynsha járdemaqy alýshylar;
- jastar.
Úmitkerdiń «Bastaý Bıznes» jobasy boıynsha kásipkerlik negizderine oqytý týraly 3 jyldan aspaıtyn merzimge sertıfıkaty bolýy tıis.
Rásimderdiń ashyqtyǵyn qamtamasyz etý, adamı faktordy azaıtý, ótinish berýshilerge yńǵaıly bolý úshin granttar berýdiń búkil prosesi elektrondyq formatqa aýystyryldy. Grant alýǵa ótinimderdi qabyldaý biryńǵaı tereze – «Business.enbek.kz» portaly arqyly júzege asyrylady.
Grantty qajetti qural-saımandardy, eńbek quraldaryn, tehnologıalyq jabdyqtardy, maldardy, janýarlardy, qustardy, kóshetterdi, butalardy, tuqymdardy satyp alýǵa, oryn-jaılardy jalǵa alý aqysyn tóleýge alýǵa bolady.
Granttar tutynýshylyq maqsattarǵa, kredıttik qaryzdardy óteýge, jyljymaıtyn turǵyn úı satyp alýǵa jáne salýǵa, jer ýchaskelerin satyp alýǵa, aksızdeletin ónimder óndirýge berilmeıdi.
Granttardy halyqty jumyspen qamtý ortalyqtary grant alýǵa úmitkerlerdiń ótinishterin qaraý jónindegi aýdandyq/qalalyq komısıanyń sheshimi negizinde beredi.
Úmitkerler óz bıznes-jobasyn komısıa otyrystarynda tanystyrady. Bul rette komısıanyń árbir múshesi bıznes-jospardy baǵalaıdy jáne baǵalaý paraǵyn mynadaı ólshemsharttar boıynsha toltyrady: bıznes-ıdeıanyń básekege qabilettiligi, ótkizý naryqtarynyń pysyqtalýy, bıznes-jobanyń qarjylyq ómirsheńdigi, kásipkerlik daǵdylardyń deńgeıi, jańa jumys oryndaryn qurý.
Osylaısha, grant berý týraly sheshim komısıalyq túrde jáne úmitkerlerdiń bıznes-jobalarynyń pysyqtalýyn baǵalaýdyń naqty ólshemsharttary negizinde qabyldanady.
Komısıa sheshimi úmitkerdiń Portaldaǵy jeke kabınetine jiberiledi. Komısıanyń oń sheshimi bolǵan jaǵdaıda, úmitker bank derektemelerin usynady, shartqa qol qoıady jáne odan ári toqsan saıyn qarajattyń paıdalanylýy týraly esep beredi. Munyń bári halyqty jumyspen qamtý ortalyqtaryna barmaı-aq, elektrondyq formatta jasalady.