Zeınet jasyna tolǵanda nemese Áleýmettik kodekste kózdelgen ózge de jaǵdaılar týyndǵan kezde salymshy BJZQ-dan turaqty tólemder ala bastaıdy.
Árbir salymshynyń jınaqtaýshy zeınetaqysy onyń zeınetaqy jarnalary jáne jınaqtalǵan ınvestısıalyq kirisi esebinen qalyptastyrylǵan zeınetaqy jınaqtarynyń somasyna tikeleı baılanysty, dep habarlaıdy aqshamnews.kz
Esterińizge sala keteıik, BJZQ-dan beriletin tólemder Qazaqstan Respýblıkasy Úkimetiniń 2023 jylǵy 30 maýsymdaǵy qaýlysymen bekitilgen Zeınetaqy tólemderiniń mólsherin esepteý ádistemesine sáıkes júzege asyrylady.
Ádistemege saı, zeınetke shyǵatyn azamattarǵa aı saıyn jasalatyn tólem bylaı esepteledi: tólem ala bastaıtyn alǵashqy jyly zeınetaqy jınaqtarynyń somasy zeınetaqy jınaqtarynyń 6,5% tólem mólsherlemesine kóbeıtilip, 12-ge bólinedi. Odan keıingi jyldary aı saıynǵy tólem zeınetaqy tólemderin ındeksteýdiń 5% mólsherlemesine ulǵaıyp otyrady. Bul rette BJZQ-dan beriletin aı saıynǵy tólem respýblıkalyq búdjet týraly zańda tıisti qarjy jylyna belgilengen eń tómengi kúnkóris deńgeıiniń (budan ári - KD) keminde 70% mólsherinde júzege asyrylady (2025 jylǵy eń tómengi kúnkóris deńgeıi - 46 228 teńge). Qordan beriletin tólemderdiń eń joǵary mólsheri shektelmeıdi jáne alýshynyń zeınetaqy jınaqtarynyń somasyna baılanysty.
"Merzimsiz ýaqytqa belgilengen 1 nemese 2 toptaǵy múgedektigi bar adamdar, sondaı-aq zıan jáne qaýipti óndiristerde jumys istep, zeınet jasyna tolǵan, olardyń paıdasyna jıyntyǵynda kem degende alpys aı mindetti kásiptik zeınetaqy jarnalary tólengen adamdar sıaqty belgili bir sanattaǵy alýshylar úshin Ádistemede aı saıynǵy zeınetaqy tóleminiń mólsherin arttyratyn túzetý koefısıentteri kózdelgen. Joǵaryda kórsetilgen sharttardyń bireýinen artyǵyn qanaǵattandyratyn adamdar úshin eń úlken mánge ıe túzetý koefısıenti qoldanylady", - delingen habarlamada.
BJZQ-dan beriletin zeınetaqy tólemderi jeke zeınetaqy shotyndaǵy zeınetaqy jınaqtary taýsylǵanǵa deıin júzege asyrylady. Jeke zeınetaqy jınaqtary salymshynyń menshigi bolǵandyqtan, olar azamattyq zańnamada kózdelgen jalpy tártippen muraǵa da qaldyrylady.