Aıyptalýshylar Qazaqstanda birneshe esirtki zerthanalaryn quryp, sıntetıkalyq esirtki jetkizýshileri men betbelgi qoıýshylardy «jumysqa» tartýdy kózdegen.
Almatyda transulttyq uıymdasqan qylmystyq top múshelerine úkim shyqty, – dep habarlaıdy aqshamnews.kz Polisia.kz-ke silteme jasap.
Eske salaıyq, 2023 jyldyń jazynda ónerkásiptik aýqymda sıntetıkalyq esirtki óndirý úshin elge prekýrsorlardy jetkizýdi jolǵa qoıǵan kórshiles memleketterdiń azamattarynan turatyn transulttyq esirtki tasymaly tobynyń qyzmeti toqtatyldy.
Halyqaralyq qylmystyq topty qolǵa túsirý İİM men Almaty polısıasynyń júrgizgen jedel jumysynyń nátıjesinde múmkin boldy. Árbir qatysýshynyń rólin jáne basqa da adamdardyń qatysýyn anyqtaý úshin «arnaıy júk» onyń búkil baǵyty boıynsha, sonyń ishinde áýe barlaýyn qoldaný arqyly baqylandy. Prekýrsorlar men jabdyqtardy tasymaldaýdy, onyń ishinde shekaradan ótýdi qurylys materıaldary men turmystyq hımıa atyn jamylǵan logıstıkalyq kompanıa júzege asyrǵany belgili boldy.
Arnaıy is-sharanyń ártúrli kezeńderinde polısıa qyzmetkerleri prekýrsorlardyń kontrabandasymen aınalysqan úsh sheteldikti ustady. Sońǵy kezeńde Almatyda qalǵan aıyptalýshylar – kórshi eldiń eki azamaty men Qazaqstan azamaty ustaldy, olardan mefedron men shet memlekettiń quqyq qorǵaý organy qyzmetkeriniń jalǵan kýáligi tárkilendi.
Jalǵa alynǵan qoımalardy ruqsat etilgen tintý barysynda psıhoaktıvti zattardy sıntezdeýge arnalǵan 1160 bóshke ártúrli prekýrsorlar, «sıntetıka» óndirýge arnalǵan 7 qorap arnaıy zerthanalyq jabdyq, eki reaktor jáne 5 hımıalyq qural-jabdyq tabylyp, tárkilendi. Tárkilengen prekýrsorlardyń jalpy kólemi shamamen 73 tonnany (72,7) qurady. Osylaısha polıseıler 8 tonna sıntetıkalyq esirtkiniń óndirisine tosqaýyl qoıdy. Bul 8 mıllıon bir rettik doza. Almaty prokýratýrasynyń kómegimen QK-niń 264-baby (Transulttyq uıymdasqan qylmystyq top qurý jáne basqarý) boıynsha sotqa deıingi tergeý júrgizildi.
Almaty qalasynyń qylmystyq ister jónindegi mamandandyrylǵan aýdanaralyq sotynyń úkimimen atalǵan uıymdasqan qylmystyq toptyń tórt múshesi joǵaryda atalǵan qylmystardy jasaǵany úshin kináli dep tanylyp, 10 jyldan 14 jylǵa deıin bas bostandyǵynan aıyryldy.