Qazaqstanda biryńǵaı ýaqyt beldeýi engiziletin boldy.
Buǵan deıin ǵalymdar men sarapshylardyń qyzý talqysynda bolǵan máselege Saýda jáne ıntegrasıa mınıstrligi núkte qoıdy, dep habarlaıdy Almaty-akshamy.kz.
Qazir tıisti túzetýler jobasy daıyndaldy. Endi 2024 jyldyń 29 aqpanynan 1 naýryzǵa qaraǵan túni saǵat 00:00-de Astana, Almaty, Shymkent, Abaı, Aqmola, Jambyl, Jetisý, Qaraǵandy, Qostanaı, Pavlodar, Soltústik Qazaqstan, Túrkistan, Ulytaý jáne Shyǵys Qazaqstan oblystary jergilikti ýaqytty 1 saǵatqa artqa jyljytady. Osylaısha, elimizdiń barlyq aımaǵy 5-shi saǵattyq beldeýde ornalasady.
«Mysaly Qostanaıda jazda 11-ge deıin kún batpaıdy. 11-den keıin ǵana 12-ge jaqyn kún bata bastaıdy. Biryńǵaı beldeý bolǵasyn basqarý jáne ekonomıkalyq jaqtan oń áser etedi. Ekinshi jaqtan densaýlyqqa oń áser etedi», - deıdi QR Parlamenti Májilisiniń depýtaty Erkin Ábil.